Nakhlje koro 70 berš sar but Izraelcija irindže pe ko Jerusalim. Ama, disave pana živindže ko avera thana ko Persijsko kraljevstvo. Jekh oljendar hine o svešteniko o Jezdra kova sikavdža e narodo ando e Jehovaso zakon. O Jezdra šundža so o manuša ko Jerusalim na šunena e Devljeso zakon, hem odoljese manglja te džal koro ljende hem te pomožini ljen. O persijsko kralj, o Artakserks, phendža ljese: „O Devel čerdža tut te ove mudro te šaj te sikave e manušen ando ljeso zakon. Dža hem lje svakone kova mangela te džal tuvaja.“ O Jezdra reslja pe sarinencar kola manglje te irinen pe ko Jerusalim. On molindže pe e Jehovase te arakhi ljen ko odova baro drumo hem podžindže.

Palo štar masekija, reslje ko Jerusalim. O knezija phendže e Jezdrase: „O Izraelcija na šundže e Jehova hem ljelje pese romnjen kola služinena e hovavne devljendže.“ So čerdža o Jezdra? Anglo sa o narodo pelo ko kočija hem molindža pe: „Jehova, tu čerdžan but buča amendže, ama amen but grešindžam tuče.“ Iako o manuša kajindže pe, on pana čerdže buča kola na hine ispravna. O Jezdra birindža starešinen hem sudijen te dikhen soj tano o problemi. Aso trin masek sarine kola na služindže e Jehovase hine paldime odothar.

Nakhlje 12 berš. Dži trajindže odola berša, o jerusalimska zidija paljem hine čerde. O Jezdra čedindža e manušen ko trg te čitini ljendže e Devljeso zakon. Ked phravdža i knjiga, o narodo uštindža ko pre. O Jezdra počmindža te hvalini e Jehova, a on vazdindže pe vasta te mothoven so slažinena pe oljeja. O Jezdra čitindža hem objasnindža o zakon, a o manuša šundže lje. On priznajindže so cidindže pe kotar Jehova, hem počmindže te roven. Aver dive, o Jezdra paljem čitindža kotar zakon. On haljilje so pana hari, valjani te slavinen o Praznik senica. Odoljese, odmah počmindže te spreminen pe e praznikose.

 Dži efta dive slavindže o prazniko, o narodo hine but radosno hem zahvalno e Jehovase asi šukar žetva. Asavko Praznik senica na hine pana ando e Isuseso Navineso vreme. Palo praznik, o manuša čedindže pe hem molindže pe: „Jehova, tu spasindžan amen kotar ropstvo, parvardžan amen ki pustinja hem dindžan amen akija šuži phuv. Ama, amen stalno grešindžam tuče. Bičhaldžan amendže prorokija te opomeninen amen, ama amen na šundžam ljen. Tu hijan lje but strpljivo amencar hem na bisterdžan odova so obećindžan e Avrahamese. Akana amen obećinaja so ka ova tuče poslušna.“ On pisindže odova so obećindže, a palo odova o knezija, o Levitija hem o sveštenikija čhivdže pečat ko odova.