Май бут израильтяноря рисайлэ андо Иерусалимо. Када сас, кала прожыля варикай 70 бэрш. Но дэсавэ израильтяноря инке всаек жувэнас андэ разни ҭана андэ Персидско империя. Машкар лэндэ сас о рашай Ездра, саво сытярэлас лэ Иеговастирэ законости. О Ездра уӷангля, кай кодэла, ко жувэн андо Иерусалимо, на ритярэн лэ Иеговаско законо. Тоди во закамля тэ жал интя, кай тэ поможый лэнди. О Персидско царё о Артаксерксо ԥэндя лэсти: «Жа! О Дэл дя тути годи, кай ту тэ сытярэс лэ манушэн тэ ритярэн лэско законо. Лэ пэса всаворэн, ко закамэла туса тэ жал». О Ездра стидя всаворэн, ко камэлас тэ рийпэ андо Иерусалимо. Вонэ манглэ лэ Иеговас, кай во тэ фэрий лэн андо баро дром и тоди вонэ жылэ.

Через штар шон, вонэ авелэ андо Иерусалимо. Катутнэ князёря ԥэндэ лэ Ездрасти: «Израильтяноря парашэлэ тэ кандэн лэ Иеговас. Вонэ линэ пэсти жувлян, савэ тэлён хохавнэ дэвлэнди». Со стердя о Ездра? Англа яқа кай вся о народо, во терделя пэ чанга и ля тэ мангэлпэ: «Иегова, ту бут со важ амэндэ стердян, ай амэ терас бэзэх против тутэ». После када и мануша линэ тэ каинпэ. Но лэнди всаек инке трэбуй сас тэ поможын. О Ездра мангля анда Израилё лэ барэдэрэн и кодэлэн, ко сындон, тэ розлэнпэ андэ када и тэ дэн зор лэнди. Всаворэ, ко на тэлёлас лэ Иеговасти, важ и трин шон ужылэтар анда Иерусалимо.

Прожыля 12 бэрш. Важ кадэя время и евреёря вазглэ лэ иерусалимостирэ стины. Через када о Ездра стидя лэ манушэн пэ ӷлавно ҭан андо форо, кай тэ заадиной лэ Дэвлэско законо. Кала о Ездра ԥэрнадя и книӷа, вся о народо ущеля. О Ездра ля тэ прославляет лэ Иеговас, ай и мануша вазглэ и вас, кай тэ сыкавэн, кай вонэ гиндон, сар о Ездра. После када о Ездра ля тэ адиной и тэ росԥэнэн важ законо, ай и мануша линэ драго тэ ашунэн. Вонэ полинэ, кай упалэ отжылэ лэ Иеговастар и заровдэ. Пэ авэр дес о Ездра упалэ ля тэ адиной о законо.  И мануша полинэ, кай йто авэла празднико, пэ саво терэн и шалашоря, и вонэ линэ тэ тидэнпэ каринг о празднико.

О празднико жалас курко. Пэ кадэва празднико, и мануша радосавэнас и ԥэнэнас «наис» лэ Иеговасти важ о лашо урожаё. Кацаво празднико, пэ саво терэн и шалашоря, на сас жы кодэла времятар, сар сас о Иисусо Навино. После празднико и мануша стидэпэ и линэ тэ мангэнпэ: «Иегова, ту амэн одмэклян анда рабство, проварэсас амэн андэ пустыня и дян амэнди кадэя лащи ԥув. Но упалэ и упалэ амэ ԥагасас тирэ законоря. Ту бишалэсас лэ пророконэн тэ сытярэн амэн, но амэ на ашунасас лэн. Ту на грабисаспэ тэ холявэс пар мэндэ. Ту зритярэсас пэско алав, саво дян лэ Авраамости. Акана амэ дас алав, кай аваса тэ кандас тут». Вонэ запистросардэ кадэва алав, ай и князёря, левиторя и рашая стодэ пэстири печать.