Ua pe ā ma le 70 tausaga talu ona toe foʻi i Ierusalema toetoe o tagata Isaraelu uma, ae sa iai pea nisi sa nonofo i vaega eseese o le emepaea o Peresia. O se tasi o i latou o se ositaulaga e igoa iā Esera, o lē na aʻoaʻoina atu le Tulafono a Ieova. Na iloa e Esera e lē o tausia e tagata i Ierusalema le Tulafono, ma na ia manaʻo e fesoasoani iā i latou. Na faapea atu Aretaseta le tupu o Peresia iā Esera: ʻNa foaʻi atu e le Atua le atamai iā te oe ina ia mafai ona e aʻoaʻo atu lana Tulafono. Ia e alu ma ave so o se tasi e manaʻo e lua te ō faatasi.’ Na feiloaʻi Esera ma i latou uma na mananaʻo e toe foʻi i Ierusalema. Na latou tatalo iā Ieova ina ia puipuia i latou a o alu la latou faigāmalaga umi, ma latou ō ese loa.

Na latou taunuu i Ierusalema i le fā masina mulimuli ane. Na faapea atu perenise i Ierusalema iā Esera: ʻUa lē usiusitaʻi tagata Isaraelu iā Ieova, ma ua latou faaipoipo i fafine na tapuaʻi i atua sesē.’ O le ā na faia e Esera? Na tootuli Esera i luma o tagata ma tatalo: ʻIeova e, e tele mea ua e faia mo i matou, ae ua matou agasala iā te oe.’ Na salamō tagata, ae sa latou faia pea mea sesē. Na filifilia e Esera toeaina ma faamasino e iloilo nei mataupu. I le tolu masina na sosoo ai, na aveesea ai i latou e leʻi tapuaʻi iā Ieova.

Ua mavae le 12 tausaga, ma ua māeʻa ona toe fausia pā o Ierusalema. O lea na faapotopoto ai e Esera tagata i le nofoaga faitele, ina ia faitauina atu iā i latou le Tulafono a le Atua. Ina ua tatala e Esera le tusi, ona tūtūlaʻi lea o tagata. Na vivii Esera iā Ieova, ma na ioe foʻi i ai tagata ma sisii i luga o latou lima. Ona faitau lea e Esera o le Tulafono ma faamatala atu, ma na faalogologo lelei tagata. Na latou taʻutino atu ua latou toe tuua foʻi Ieova, ma na latou fetagisi. I le aso na sosoo ai, na toe faitau atu e Esera isi vaega o le Tulafono iā i latou. Na latou iloaina ai e lē o toe umi ona faamanatuina lea o le Tausamiga o Fale Lauvao. O lea na amata ai loa a latou tapenapenaga mo le tausamiga.

 A o faagasolo aso e fitu o le tausamiga, na olioli tagata ma faafetai iā Ieova mo le lelei o fua o le seleselega. E leʻi faia faapea se Tausamiga o Fale Lauvao talu mai aso o Iosua. Ina ua māeʻa le tausamiga, ona faapotopoto lea o tagata ma tatalo: ʻIeova e, ua e laveaʻiina i matou mai i le nofo pologa, fafaga i matou i le toafa, ma aumai lenei laueleele matagofie mo i matou. Ae sa faaauau pea ona matou lē usiusitaʻi iā te oe. Na e auina mai perofeta e lapataʻia i matou, ae e matou te leʻi faalogo. Peitaʻi sa e onosaʻi mai pea. Na e tausia pea lau folafolaga sa faia iā Aperaamo. O lea, e matou te taʻutino atu o le a matou usiusitaʻi iā te oe.’ Na latou tusia la latou taʻutinoga, ma na faamaufaailogaina e perenise, le ʻau sa Levī, ma ositaulaga.