Sowan 70 yari ben pasa di den Israelsma drai go baka na Yerusalem. Ma wan tu fu den ben e libi ete na ini difrenti kontren di den Persiasma ben e tiri. Wan fu den sma disi na a priester di nen Esra. A ben leri a pipel a Wet fu Yehovah. Esra ben yere taki den sma na ini Yerusalem no e du san a Wet taki. Dati meki a ben wani go drape fu yepi den. Kownu Artakserkses fu Persia taigi en: ’Gado gi yu koni so taki yu kan leri sma a Wet fu en. Yu kan go. Yu kan tyari ala sma di wani go nanga yu.’ Esra kon makandra nanga ala sma di ben wani drai go baka na Yerusalem. Den begi Yehovah fu kibri den so taki noti pasa nanga den na a langa pasi di den ben o teki. Baka dati den gowe.

Baka fo mun, den doro Yerusalem. Den edeman drape taigi Esra: ’Den Israelsma trangayesi Yehovah. Den trow nanga uma di e anbegi falsi gado.’ San Esra du? Esra saka kindi leti na fesi a pipel, dan a begi: ’Yehovah, yu du so furu bun gi wi, ma wi sondu teige yu.’ A pipel ben sori berow, ma toku den ben abi yepi fanowdu fu du san bun. Dati meki Esra poti owru man nanga krutuman fu luku a tori disi. A teki dri mun fu seti a tori èn fu seni den sma gowe di no ben e dini Yehovah.

Twarfu yari pasa. Den skotu lontu Yerusalem ben kaba bow. Esra kari a pipel kon makandra fu leisi a Wet fu Gado gi den. Di Esra opo a wetbuku, den sma opo tanapu. Esra prèise Yehovah èn den sma opo den anu go na loktu, dan den taki: ’Amen.’ Dan Esra leisi a Wet èn a fruteri den san a Wet wani taki. A pipel ben arki bun. Den kon si taki den no ben du san Yehovah taki èn dati meki den bigin krei. A tra dei, Esra leisi moro sani fu a Wet gi den. Den leri taki a ten ben e doro fu hori a Kampufesa. Wantewante den bigin seti sani fu hori a fesa.

Seibi dei langa den hori a fesa. A pipel ben e prisiri èn den taki Yehovah tangi taki den ben koti furu nyanyan  na den gron. Sensi a ten fu Yosua den no ben hori so wan bigi Kampufesa moro. Baka a fesa a pipel kon makandra, dan den begi: ’Yehovah yu frulusu wi fu katibo, yu sorgu wi na ini a sabana èn yu gi wi wan moi kondre. Ma ibri leisi baka wi ben trangayesi yu. Yu seni yu profeiti fu warskow wi, ma wi no arki. Toku yu hori pasensi nanga wi. Yu du san yu ben pramisi Abraham. Now wi e pramisi yu taki wi o gi yesi na yu.’ Den skrifi na tapu papira san den pramisi èn den granman, den Leifisma nanga den priester poti den stampu na tapu a papira.