Lilemo tse ka bang 70 ka mor’a hore Baiseraele ba khutlele Jerusalema, ba bang ba ne ba ntse ba lula likarolong tse ling tsa ’Muso oa Persia. E mong oa bona ke moprista Esdrase, ea neng a ruta batho Molao oa Jehova. Esdrase o ne a lemohile hore Baiseraele ba Jerusalema ha ba latele Molao. Kahoo a ikemisetsa ho ea teng e le hore a ba thuse. Morena Artaxerxese oa Persia o ile a re ho eena: ‘Molimo o u file bohlale e le hore u rute batho Molao oa hae. Tsamaea le bohle ba batlang ho tsamaea le uena.’ Kahoo, Esdrase a bitsa Bajuda bohle ba batlang ho khutlela Jerusalema. Ba rapela Jehova hore a ba sireletse leetong le letelele leo ba tl’o le nka ’me ba kena tseleng.

Ka mor’a likhoeli tse ’nè, ba ile ba fihla Jerusalema. Likhosana tsa re ho Esdrase: ‘Baiseraele ha baa mamela molao oa Jehova ’me ba nyetse basali ba rapelang melimo ea bohata.’ Esdrase o ile a etsa’ng? O ile a khumama ka pel’a sechaba ’me a rapela a re: ‘Jehova, u re etselitse lintho tse ngata, empa re u foselitse.’ Baiseraele ba ile ba baka, le hoja ba ne ba ntse ba etsa lintho tse fosahetseng. Esdrase o ile a khetha baholo le baahloli hore ba lokise bothata bona. Ka likhoeli tse tharo tse latelang, ba ile ba leleka batho ba sa rapeleng Jehova.

Ho ile ha feta lilemo tse 12. Ka nako eo, marako a motse oa Jerusalema a ile a tsosolosoa. Kahoo, Esdrase a bokellela sechaba lepatlelong ho se balla Molao oa Molimo. Ha Esdrase a bula buka, sechaba se ile sa ema. O ile a rorisa Jehova ’me sechaba sona sa phahamisa matsoho ho lumellana le eena. Ka mor’a moo, Esdrase a bala Molao a ba a o hlalosa, ’me sechaba sa mamela ka hloko. Sa lumela hore se boetse se khelohile tseleng ea Jehova ’me sa lla. Ka le hlahlamang, Esdrase a boela a se balla Molao. Baiseraele ba hlokomela hore haufinyane ba lokela ho keteka Mokete oa Maphephe. Hang-hang ba qala ho lokiselletsa mokete oo.

Baiseraele ba qeta matsatsi a supileng a mokete oo ba thabile ba bile ba leboha Jehova ha a ba hlohonolofalitse  ka kotulo e ntle. Mokete oa Maphephe o tšoanang le oo o ne o qetetse ho ba teng mehleng ea Joshua. Ha mokete oo o fela, sechaba sa phutheha ’me Esdrase a rapela a re: ‘Jehova, u re lokolotse bokhobeng, oa re fepa lehoatateng, oa ba oa re fa naha ena e ntle. Empa khafetsa-khafetsa ra u siteloa. Oa romela baprofeta ho re lemosa, empa ha rea ka ra mamela. Leha ho le joalo, u ile oa re mamella. Oa phethahatsa tšepiso ea hao ho Abrahama. Joale re u tšepisa hore re tla u mamela.’ Ba ngola fatše seo ba se tšepisitseng ’me likhosana, Balevi le baprista ba beha tiiso ea bona.