PĚNGANGĚNDUNGANG 66
Ezra Něněntiro Hukungu Mawu
Ěndịu 70 su taunge dongkeng tau Israel napul᷊ẹ sarang Yerusalem, bědang piạ tau Israel mětẹ̌tanạ su wilayah kararatuangu Persia. Sěngkatau bọu i sire ute imang Ezra, kụ i sie měnẹ̌něntiro Hukung i Yehuwa. Su tempong nakasingkạ taumata su Yerusalem tawe timuhụ su Hukung, i sie mapulu mẹ̌tul᷊ung si sire. Artahsasta, datung Persia, nẹ̌bera si sie, ’Mawu někoạ si kau matahuěna hakị u ene i kau botonge měněntiro Hukung’E. Dakọe tamai, kụ paringangke i saing mapulu matamai ringangu.’ Ezra nẹ̌komol᷊ẹ̌ dingangi sire apang mapulu mẹ̌bal᷊ị sarang Yerusalem. I sire nẹ̌doa tadeạu Yehuwa měndiagạ si sire su ral᷊eng, bọu ene i sire dimal᷊eng.
Ěpạ u wul᷊ang bọu ene, i sire nahumpạ su Yerusalem. Manga těmbonang naul᷊ị si Ezra, ’Tau Israel seng tawe timuhụ si Yehuwa. I sire nẹ̌kawing dingangu manga wawine apang měnẹ̌němbah berhala.’ Apa nikoạ i Ezra? Su těngong i sire, i Ezra nẹ̌doa, ’Yehuwa, i Kau seng někoạ lawọ hal᷊ẹ̌ gunang i kami, katewe i kami nẹ̌dosa si Kau.’ Tau Israel apidu nẹ̌tobatẹ̌, katewe harusẹ̌ piạ u mẹ̌tul᷊ung si sire měkoạ barang nihino. Ezra němile pirang katau těmbonang dingangu hakim gunang měngurusẹ̌ masalah ene. I sire něngurusẹ̌ ene karěngụe tělu wul᷊ang, kụ i sire apang madiri maněmbah si Yehuwa nitokol᷊ẹ̌.
Mapul᷊o dua taung tuhụe, su tempong těndạu Yerusalem nasueng koạe, i Ezra něngoro tau Israel pẹ̌komol᷊ẹ̌ su tana lapang. I sie mapulu mẹ̌basa Hukungu Mawu si sire. Su tempong bukẹ̌ u hukum niwuka, tau Israel dimarisị. Ezra nẹ̌dalo si Yehuwa, kụ i sire něhengkẹ lima tatialang i sire setuju. Bọu ene, i Ezra nẹ̌basa Hukung dingangu nělahẹ ene si sire. I sire kěbị dimaringihẹ̌. kI sire nasadarẹ̌ i sire seng tawe masatia si Yehuwa, kụ i sire simangị. Sěngkarịěllone, Ezra saụ nẹ̌basa Hukung ene. I sire nakasingkạ seng mal᷊ighạ tempone Perayaan Selo bọu Daukalu. Hakị u ene, i sire apidu nẹ̌sasadia měkoạ perayaan ene.
Karěngụe pitu ěllo perayaan ene, tau Israel mal᷊uasẹ̌ dingangu nakitarimakasẹ si Yehuwa ual᷊ingu hasilu sasuang i sire mal᷊awọ. Dongkeng zaman i Yosua, bědang tawẹ apa Perayaan Selo bọu Daukalu kerene. Nasueng perayaan, i sire nẹ̌komol᷊ẹ̌ kụ nẹ̌doa, ’Yehuwa, i Kau seng napakawebasẹ̌ si kami bọu pẹ̌tatahuělang, něgělị kaěng si kami su padang gurun, dingangu něgělị si kami banua sěbạe mapaelẹ̌. Katewe, i kami masau tawe tụtuhụ si Kau. I Kau něngoro manga nabi měgělị laingatẹ̌ si kami, katewe i kami tawe dimaringihẹ̌. I Kau turusẹ̌ masabarẹ̌ si kami. I Kau tatapẹ̌ někoạ diandi-Nu si Abraham. Orasẹ̌ ini, i kami mẹ̌diandi sarung tumuhụ si Kau.’ I sire němohẹ dianding i sire, kụ manga těmbonang, tau lewi, dingangu manga imang napakasah ene.
”Mal᷊uasẹ̌ taumata apang dimaringihẹ̌ hengetangu Mawu kụ někoạ ene.”—Lukas 11:28