Aya oko ɛnɔnyi 70 ntatɛ lam’akakalola efula k’ase Isariyɛlɛ la Jɛrusalɛma, koko amɔtshi wakatetemala mbidjasɛ lo bɛtshi diotshikitanyi dia lo diolelo dia Pɛrɛsiya. Ɔmɔtshi l’atei awɔ aki ɔlɔmbɛdi Ɛzɛra, laketshaka anto Ɛlɛmbɛ wa Jehowa. Ɛzɛra akoke dia anto waki la Jɛrusalɛma kondjelaka Ɛlɛmbɛ ndo nde akalange ntshɔ lɛkɔ dia towakimanyiya. Aratashasha nkumekanga ka Pɛrɛsiya akawotɛ ate: ‘Nzambi akosha lomba dia wɛ mbetsha Ɛlɛmbɛ ande. Tshɔka wɛ la onto tshɛ lalanga ntshɔ la yɛ.’ Ɛzɛra akasangana la wanɛ tshɛ wakalange nkalola la Jɛrusalɛma. Vɔ wakalɔmbɛ Jehowa dia mbakokɛ lo lɔkɛndɔ lawɔ l’otale, ko wakonɛɛ.

Ngɔndɔ nyɛi l’ɔkɔngɔ, vɔ wakakome la Jɛrusalɛma. Ewandji wa lɛkɔ wakatɛ Ɛzɛra vate: ‘Ase Isariyɛlɛ wambohindolɛ Jehowa ndo wambotshuka wamato watɛmɔla tozambizambi ta kashi.’ Kakɔna kakasale Ɛzɛra? La ntondo k’anto, Ɛzɛra akake adwe ndo akalɔmbɛ ate: ‘Jehowa le, wɛ ambotosalɛ akambo efula koko sho tambokosalɛ pɛkato.’ Anto wakayatshumoya, koko vɔ wakatetemala nsala akambo akina waki komonga dimɛna. Ɛzɛra akasɔnɛ dikumanyi ndo toshushi dia vɔ menda akambo asɔ. Lo ngɔndɔ shato yakayele, wanɛ waki kɔtɛmɔlaka Jehowa wakatshanyema.

Ɛnɔnyi dikumi l’ehende wakete. Lo etena kɛsɔ, mpele diakadinge Jɛrusalɛma diakahikama nto. Ɔnkɔnɛ, Ɛzɛra akatshumanya anto lo dihole dia lo sɛkɛ dia mbowawadiyɛ Ɛlɛmbɛ wa Nzambi. Lam’akafola Ɛzɛra dibuku, anto wakemala. Nde akatombola Jehowa ndo vɔ wakemɛ anya awɔ l’olongo dia mɛnya dia vɔ mbetawɔka dui sɔ. Oma laasɔ, Ɛzɛra akadia ndo akalembetshiya Ɛlɛmbɛ ndo anto wakahokamɛka la yambalo. Vɔ wakasuya dia wakaangana nto la Jehowa, ko wakalele. La wedi a pindju, Ɛzɛra akanyomowawadiyɛ nto Ɛlɛmbɛ. Vɔ wakeye dia kem’edja vɔ wakahombe nsala Fɛtɛ ka  Totombotombo. Oma ko etena kɛsɔ, vɔ wakatatɛ ndjalɔngɔsɔla dikambo dia fɛtɛ.

Lo nshi esambele ya fɛtɛ, anto wakangɛnangɛna ndo wakasha Jehowa losaka lo woho wakawangɔnya diangɔ. Ndooko Fɛtɛ ka Totombotombo ka ngasɔ kakasalema ntatɛ lo nshi ya Jashua. L’ɔkɔngɔ wa fɛtɛ, anto wakatshumana ndo wakalɔmbɛ vate: ‘Jehowa le, wɛ akatotshungola oma lo lɔhɔmbɔ akatolesha l’oswe wa shɛnga ndo akatosha nkɛtɛ ya dimɛna efula nyɛ. Koko mbala la mbala, sho takakohindolɛ. Wɛ akatome amvutshi dia ndjotewola, koko sho kompokamɛ. Kaanga mbakidiɔ ngasɔ, wɛ aki la solo dia lotutsha. Wɛ akakotsha daka diakayalake Abrahama. Kakianɛ tambolaka dia tayokokitanyiyaka.’ Vɔ wakafunde daka diawɔ lofunda ndo ewandji, ase Lɛwi ndo ɛlɔmbɛdi wakadje ohomɔ awɔ lɔkɔ.