Pangujumpha vyaka pafupifupi 70, kutuliya po Ayisraele anandi anguwere ku Yerusalemu kweni anyaki ajanga mbwenu muvigaŵa vakupambanapambana va Ufumu wa Perese. Yumoza mwaku yiwu, wenga wasembi Ezra yo wasambizanga Marangu ngaku Yehova. Ezra wanguvwa kuti Ayisraele ku Yerusalemu, alondonga cha Marangu ngaku Chiuta ndipu wakhumbanga kuluta kuchiŵawovya. Fumu Arataserese ya ku Perese yingukamba kuti: ‘Chiuta wakukupasa zeru kuti usambizi ŵanthu Marangu ngaki. Luta, uto weyosi yo wakhumba kuti waluti nawi.’ Ezra wanguwunganisa ŵanthu wosi wo akhumbanga kuwere ku Yerusalemu. Yiwu angupemphera kwaku Yehova kuti waŵavikiliyi pa ulendu wawu utali ndipu pavuli paki angwamba ulendu wo.

Yiwu angufika ku Yerusalemu pati pajumpha myezi yinayi. Alongozgi wo ŵenga kwenuku angukambiya Ezra kuti: ‘Ayisraele amunangiya Yehova ndipu ato anthukazi wo asopa achiuta aboza.’ Kumbi Ezra wanguchitanji? Iyu wangugwada pamasu pa ŵanthu ndi kupemphera kuti: ‘Yehova mwatichitiya vinthu vinandi ukongwa kweni takunangiyani.’ Ŵanthu angulapa kweni penga anyaki so wo akhumbikanga kuwovyeka kuti achitengi vinthu vamampha. Ezra wangusankha ŵara ndipuso akweruzga kuti aphwere nkhani zenizi. Pati pajumpha myezi yitatu, ŵanthu wosi wo akhumbanga cha kusopa Yehova anguŵadikisa.

Vyaka 12, vingujumphapu. Panyengu iyi ndipu Ayisraele amaliza kali kuzenga mpanda wa Yerusalemu. Ezra wanguwunganisa ŵanthu pabwalu kuti waŵaŵerenge Marangu ngaku Chiuta. Ezra wati wajula buku la marangu, ŵanthu wosi angusoka. Iyu wanguthamika Yehova ndipu yiwu angusoska manja kulongo kuti anguzomereza vo wangukamba. Pavuli paki, wanguŵerenga Marangu ndi kungakonkhosa ndipu ŵanthu avwisiyanga. Yiwu anguzomera kuti angumunangiya so Yehova ndipu anguliya. Mulenji waki, Ezra wanguŵerenga so Marangu nganyaki. Yiwu anguziŵa kuti kunguja ŵaka mazuŵa ngamanavi kuti achiti Phwandu la Misasa. Mwaviyo, angwambapu nyengu yeniyo kunozgeke phwandu.

 Mazuŵa 7 nga phwandu ili, ŵanthu angukondwa ndi kuwonga Yehova chifukwa chakuti angukolola vakurya vinandi. Pengavi Phwandu la Misasa lakuyanana ndi lenili kwambiya mu nyengu yaku Yoswa. Phwandu lati lamala, ŵanthu anguwungana ndipu angupemphera kuti: ‘Yehova, mukutiwombo ku ukapolu, mungutiryiska mubozwa ndipu mukutipasa charu chakutowa. Kweni kanandi takuvwiyaningi cha. Mungutuma achimi kuti atitcheŵesi kweni tinguŵavwiya cha. Chinanga kuti venga viyo, munguzizipiza. Mungusunga mbwenu vo mungulayizga Abrahamu. Sonu titikulayizgani kuti tikuvwiyeningi.’ Yiwu angulemba vo angulayizga ndipu alongozgi, Alevi ndi asembi angusayiniya vo ŵanthu wo angulemba.