Kwakaliindide kale myaka iili 70 kuzwa ciindi bana Israyeli nobakapiluka ku Jerusalemu, pele bamwi bakacili kukkala mumasena aaindene-indene mubulelo bwabana Persia. Umwi wambabo wakali mupaizi wazina lya Ezara, walo iwakali kuyiisya Mulawo wa Jehova. Ezara wakazyiba kuti bantu ku Jerusalemu tiibakali kuutobela Mulawo, aboobo wakali kuyanda kuunka kutegwa akabagwasye. Mwami waku Persia wazina lya Aritasasita wakamwaambila kuti: ‘Leza wakakupa busongo kutegwa koyiisya Mulawo wakwe. Koya, ukabweze kufwumbwa uuyanda kukutobela.’ Ezara wakaswaangana abaabo boonse ibakali kuyanda kupiluka ku Jerusalemu. Bakapaila kuli Jehova kutegwa abakwabilile mulweendo lwabo lulamfwu, kumane bakanyamuka.

Nokwakainda myezi iili 4, bakasika ku Jerusalemu. Basilutwe bakokuya bakaambila Ezara kuti: ‘Bana Israyeli bamuzangila Jehova akukwata bamakaintu ibakomba baleza bakubeja.’ Ino Ezara wakacita nzi? Kali kumbele lyabantu, Ezara wakafwugama akupaila kuti: ‘Jehova, watucitila zintu zinji kapati, pele swebo twakubisyila.’ Bantu bakeempwa, pele bakacili kucita zintu zimwi zibi. Ezara wakasala baalu alimwi ababetesi kuti baalanganye makani aaya. Myezi yotatwe yakatobela, aabo ibatakali kukomba Jehova bakatandwa.

Kwakainda myaka iili 12. Aciindi eeci, bwaanda bwa Jerusalemu bwakaliyakulwidwe kale. Aboobo Ezara wakabunganya bantu kutegwa ababalile Mulawo wa Leza. Ciindi Ezara naakajalula bbuku, bantu boonse bakaimikila. Wakatembaula Jehova, mpoonya balo bakatambika maanza aabo kutondezya kuti bazumina. Kumane Ezara wakaubala akuupandulula Mulawo, mpoonya bantu bakaswiilila cakubikkila maano. Bakazumina kuti bakalimuzangilide alimwi Jehova, aboobo bakalila. Buzuba bwakatobela, Ezara wakababalila makani manji kuzwa mu Mulawo. Bakaambilwa kuti kakutanainda ciindi, bakeelede kusekelela Pobwe lya Zivwuka. Mpoonya aawo, bakatalika kulibambila pobwe eelyo.

Mumazuba aali 7 ngobakali kusekelela pobwe, bantu bakakkomana akulumba Jehova akaambo kabutebuzi bubotu. Tiikwakaningabede Pobwe lya Zivwuka ilili mbuli  leeli kuzwa mumazuba aa Joshua. Nolyakamana pobwe, bantu bakabungana antoomwe akupaila kuti: ‘Jehova, wakatuvwuna mubuzike, wakatusanina munkanda, alimwi wakatupa nyika eeyi mbotu. Pele twakakubisyila cakwiinduluka-induluka. Wakatutumina basinsimi kuti batucenjezye, pele tiitwakaswiilila pe. Nokuba boobo, wakatukkazikila moyo. Wakacibamba cisyomezyo ncookasyomezya Abrahamu. Lino tusyomezya kuti tunookumvwida.’ Bakacilemba cisyomezyo cabo, mpoonya basilutwe, ba Levi alimwi abapaizi bakabikka ciganto cabo alincico.