Kwakali kwayinda minyaka iili 70 kuzwa chiindi maIsrayeli nibakabweeda kuJerusalemu, pesi bamwi bakachili kukkala muzisi zyakali kweendelezegwa amaPersiya. Umwi wabo wakali mupayizi uutegwa Ezra alimwi wakayiisya mulawu waJehova. Ezra naakamvwa kuti bantu kuJerusalemu teebakali kutobelezya Mulawu, wakayeeya kwiinka kuchitila kuti akabagwasye. Mwaami wakuPersiya Aritasasta wakamubuzya kuti: ‘Leza wakakupa busongo bwakuti ukonzye kuyiisya Mulawu wakwe. Ulakonzya kwiinka abantu boonse bayanda kwiinka.’ Ezra wakabungania bantu boonse bakali kuyanda kubweeda kuJerusalemu. Bakakomba kuli Jehova kabakumbila kuti abakwabilile mulweendo lwabo lulamfu, kuzwa waawo bakeenda.

Nikwakiinda myeezi iine, bakasika kuJerusalemu. Bapati bamumuunzi bakabuzya Ezra kuti: ‘MaIsrayeli baleka kuswiilila Jehova alimwi bakakwata bamakayintu bakomba baleza bakubeja.’ Ezra wakachita biyeni? Wakafugama kunembo lyabantu akukomba kati: ‘Jehova wakatuchitila zintu zyiingi loko pesi twakubisizya.’ Bantu bakeempwa, pesi bakachili kuchita zimwi zintu zitali kabotu. Ezra wakasala baalumi bapati ababetesi kuchitila kuti balanganie makani aaya. Nikwakiinda myeezi iitatu, bantu bakatali kukomba Jehova bakatandwa.

Kwakayinda minyaka iili 12. Muchiindi eecho, miduli yakazyungulukide muunzi waJerusalemu yakali yayakululwa. Nkinkaako, Ezra wakabungania bantu mulubuwa kuchitila kuti ababalile Mulawu waLeza. Chiindi Ezra naakajula bbuku, bantu bakanyampuka. Wakalumbayizya Jehova alimwi bantu bakazumina kwiinda mukutambika maboko kujulu. Kuzwa waawo, Ezra wakabala Mulawu akuupandulula alimwi bantu bakaswiilisisya. Bakabona kuti bakali baleya munzila zyaJehova alimwi bakalila. Buzuba bwakatobela, Ezra wakababalila lubo Mulawu. Bakabona kuti bakeelede kusekelela Pobwe Lyazilawu. Mpawo, bakatalika kulibambila kusekelela pobwe.

Kwamazuba aali musanu aabili, bantu bakasekelela pobwe eeli alimwi bakalumba Jehova nkaambo bakaloolokede.  Taakwe nikwakachitidwe Pobwe Lyazilawu lili boobu kuzwa muchiindi chaJoshuwa. Nilyakamana pobwe, bantu bakabungana akukomba kuti: ‘Jehova wakatufutula kuzwa mubuzike, wakatusanina munkanda alimwi wakatupa nyika mbotu. Pesi twakaleka kukuswiilila kwaziindi zyiingi. Wakatuma basinsimi kuti batuchenjezye, pesi teetwakaswiilila pe. Nikuba boobo, wakali kutukkazikila moyo. Wakabamba chisyomezyo nchwaakachita kuli Abrahamu. Lino tuyanda kukusyomezya kuti tunookuswiilila.’ Bakachilemba aansi chisyomezyo chabo alimwi baalumi bapati bamumuunzi, maLevi abapayizi bakachisayina.