Ekʼelxa junuk 70 jabʼil yajni jitsan lek ja israʼelenyo kumxele ja bʼa Jerusalén, ama jujuntik tito aye bʼa tuktukil lugar ja bʼa mandaranel bʼa Persia. June ja bʼa yeʼnle jani ja Esdras, jun sacerdote bʼa wa sjeʼa ja sLey ja Jyoba. Ja Esdras yabʼ ja swinkil ja Jerusalén mi wanuke skʼuʼajel ja Leyi, ja yuj skʼana wajel bʼa skoltajele. Ja Artajerjes, ja mandaranum bʼa Persia, yala: «Ja Dyos yaʼunejawi biboʼil bʼa sjejel ja sLeyi. Ja yuj kaʼax sok iʼaj och chikan maʼ wa skʼana oj wajuka mok». Ja Esdras stsomo ja matik wa skʼana kumxel ja bʼa Jerusalén. Skʼanaweyi ja Jyoba atalnajuke ja bʼa bʼeji sok wajye.

Ekʼ chane ixaw, tixa kʼotye ja bʼa Jerusalén. Ja olomaliki yalawe yabʼ ja Esdras: «Ja israʼelenyo skʼokunejeyi ja yabʼal ja Jyoba sok nupanele sok ixuke wa xyaʼteltaye kʼulubʼal dyosik». ¿Jasa skʼulan ja Esdras? Koʼ mekʼan bʼa stiʼ sat ja chonabʼi sok yayi orasyon: «Jyoba, ja weʼn jel jitsan jas lek akʼulunej kitikon, pe ja keʼntikoni jleʼunej jmultikon amok». Ja chonabʼi sutxi skʼujole, pe wantoni skʼulane jastik mi lekuk. Ja yuj ja Esdras sleʼa ansyanoʼik sok jwesik bʼa a-stojbʼese ja jastik jaw. Yiʼajyujile oxe ixaw bʼa yawe eluk ja matik mi skʼanawe yaʼteltajel ja Jyoba.

Ekʼ 12 jabʼil. Malan ja bardaʼik bʼa Jerusalén chʼak tojbʼuk. Ja Esdras stsomo ja chonabʼ bʼa jaman kʼinal bʼa skʼumajelyi ja Ley bʼa Dyos. Yajni sjama ja libro, kʼeye tekʼan ja swinkil ja chonabʼi. Ja Esdras yayi stoyjel ja Jyoba, jaxa israʼelenyo yawe kʼeʼuk ja skʼabʼe bʼa sjejel akwerdoʼaye. Tsaʼan, ja Esdras skʼuman ja Leyi sok xcholo. Ja chonabʼi smaklaye lek. Sok yaʼa sbʼaje kwenta bʼa yawetakan ja Jyoba pilan ekʼele sok och okʼuke. Ja bʼa pilan kʼakʼu, ja Esdras cha snochoyi skʼumajel ja Leyi. Ja israʼelenyo yabʼye mojanxa oj skʼuluke ja Kʼin bʼa Lejchupatik. Sok tixta kʼe xchap-e sbʼaja kʼini.

Ja israʼelenyo jel gusto ajyiye ja sjukil kʼakʼu albʼi ja kʼini. Yaweyi tsʼakatal ja Jyoba yuja lekil sbʼaʼal yalaje. Mini bʼa ajyelyujile jun Kʼin bʼa Lejchupatik jastal jaw masan sakʼanto ja Josué. Yajni chʼaki, stsomo sbʼaje sok yaweyi  orasyon: «Jyoba, weʼn wa elkotikon ja bʼa mosoʼili. Awaʼa jwaʼeltikon ja bʼa takin kʼinali sok awakitikon ja tsamal luʼum it. Pe ja keʼntikoni jitsan ekʼele jkʼokʼunejtikon jawa wabʼali. Sok ama ajekakitikon jitsan alumanik bʼa oja walkabʼtikon, mini jkisatikon. Ama jachuk, ajyi apasensya. Mini chʼaya kʼujol ja jas akʼapayi ja Abrahán. Ja wego, wa xkʼapatikonawi bʼa kʼuʼabʼal oj ajyukotikon amok». Ja chonabʼi stsʼijbʼane ja skʼapjelal it. Jaxa olomalik, ja levitaʼik sok ja sacerdoteʼik skʼulane pirmar sok jun seyo.