Klostu 70 yia i lus kirap long taim planti Israel i go bek long Jerusalem, tasol sampela i stap yet long ol narapela hap bilong Gavman Persia. Wanpela bilong ol em wanpela pris, nem bilong em Esra, em i save skulim ol manmeri long Lo Bilong Jehova. Esra i harim olsem ol manmeri long Jerusalem i no bihainim Lo, na em i laik go na helpim ol. King Artaserksis bilong Persia i tokim em: ‘God i givim savetingting long yu na bai yu inap skulim ol man long Lo bilong em. Yu ken go, na kisim ol man husat i laik go wantaim yu.’ Esra i bung wantaim olgeta manmeri husat i laik go bek long Jerusalem. Ol i beten long Jehova i lukautim ol long dispela longpela wokabaut, na ol i kirap wokabaut.

Fopela mun bihain, ol i kamap long Jerusalem. Ol hetman i tokim Esra: ‘Ol Israel i no bihainim tok bilong Jehova na ol i maritim ol meri i lotuim ol giaman god.’ Esra i mekim wanem? Long ai bilong ol manmeri, Esra i brukim skru na beten: ‘Jehova, yu bin mekim planti samting bilong helpim mipela, tasol mipela i mekim sin long yu.’ Ol manmeri i tanim bel, tasol ol i mekim yet ol samting i no stret. Esra i makim sampela hetman na ol jas long painimaut gut long dispela samting. So insait long 3-pela mun, ol i salim ol manmeri husat i no lotuim Jehova i go.

Twelpela yia i lus, na ol i wokim banis i raunim Jerusalem. So Esra i bungim ol manmeri long ples bung na ritim Lo Bilong God long ol. Taim Esra i opim buk, ol manmeri i kirap sanap. Em i preisim Jehova, na olgeta i apim han i go antap long makim olsem ol i wanbel. Bihain Esra i ritim na eksplenim Lo, na ol manmeri i putim gut yau. Ol i tokaut olsem ol i lusim gen Jehova, na ol i krai. Long de bihain, Esra i ritim sampela tok moa bilong Lo long ol. Ol i kisim save olsem klostu nau ol i mas mekim Bikpela Bung Bilong i Stap Long Haus Win. Na ol i kirap long redim ol samting bilong dispela bung.

Insait long 7-pela de bilong dispela bung, ol manmeri i amamas na tenkyu long Jehova bikos ol  gaden bilong ol i kamapim planti kaikai. Kirap long taim bilong Josua, i no gat wanpela Bikpela Bung Bilong i Stap Long Haus Win olsem dispela. Bihain long dispela bung, ol manmeri i bung na beten: ‘Jehova, yu bin kisim bek mipela long wok kalabus, givim mipela kaikai long ples nating, na givim mipela dispela gutpela graun. Tasol planti taim mipela i bikhet long yu. Yu bin salim ol profet long givim tok lukaut long mipela, tasol mipela i no harim tok. Maski i olsem, yu no les kwik long mipela. Yu bihainim yet tok promis yu mekim long Abraham. Nau mipela i tok promis olsem mipela bai bihainim tok bilong yu.’ Ol i raitim tok promis bilong ol, na ol hetman, Livai, na ol pris i putim mak bilong ol long strongim dispela tok promis.