Hakaba harabireho emyaka nka 70 kuruga Abaisareri abarukukira obwingi bagaruka Yerusalemu, baitu abamu bakaba bakyali omu Bukama bwa Buperesi. Omu halibo akaba ali nyakatagara arukwetwa Ezera ayayegesaga abantu Ebiragiro bya Yahwe. Ezera akakyetegereza ngu Abaisareri omu Yerusalemu bakaba batarukuhondera Ebiragiro bya Yahwe, nahabweki akaba n’agonza kugenda kubakonyera. Omukama Atakisakisi owa Peresi akagambira Ezera ati: ‘Ruhanga akakuha amagezi nukwo osobole kwegesa abantu ebiragiro bye. Genda, kandi nosobora kugenda n’omuntu wena arukugonza kugenda naiwe.’ Ezera akasorooza hamu abantu boona abakaba nibagonza kugaruka Yerusalemu. Bakasaba Yahwe abalinde omu rugendo rwabo, kandi hanyuma bakatandika orugendo.

Hanyuma y’ameezi ana, bakahika omu Yerusalemu. Ababiito omu Yerusalemu bakagambira Ezera bati: ‘Abaisareri bajemiire Yahwe baswera abakazi abarukuramya baruhanga ab’ebisuba.’ Ezera akakora ki? Ezera akateeza amaju yasaba hali Yahwe abantu boona nibamurora. Akagamba: ‘Ai Yahwe, otukoliire bingi baitu itwe tukusisiire.’ Abantu bakegarukamu, baitu haroho ebintu bimu ebitahikire ebi bakaba nibakyakora. Ezera akakoma abakuru n’abacwi b’emisango nukwo bakonyere abantu. Ameezi asatu agahondiireho, buli muntu ow’akaba atarukuramya Yahwe akabingwa kurunga omu Yerusalemu.

Hakarabaho emyaka 12. Omu busumi obu, abantu bakongera kwombeka buhyaka ebisiika bya Yerusalemu. Nahabweki Ezera akasorooza hamu abantu nukwo abasomere Ebiragiro bya Ruhanga. Ezera obu yasukwire ekitabu ky’ebiragiro, abantu boona bakemerra. Akakugiza Yahwe, kandi boona baimukya emikono kwoleka ngu nibaikiraniza nauwe. Ezera akabasomera Ebiragiro yabibasoborra, kandi abantu bakahuliiriza kurungi. Bakaikiriza ngu bakaba bahabire kuruga hali Yahwe kandi bakarra habw’ekintu kinu. Ekiro ekyahondireho, Ezera akongera yabasomera Ebiragiro. Bakakyetegereza ngu omu busumi butali bwa hara bakaba basemeriire kujaguza Obugenyi obw’Enkande. Aho n’aho bakatandika kwetekaniriza obugenyi bunu.

 Abantu bakamara ebiro musanju eby’obugenyi bunu basemeriirwe kandi nibasiima Yahwe habw’okubaha amagesa amarungi. Kuruga omu busumi bwa Yosuha, hakaba hatakabahoga Obugenyi obw’Enkande oburukwingana na bunu. Hanyuma y’obugenyi, abantu bakesorooza kandi basaba bati: ‘Ai Yahwe, okatucungura kuruga omu bwiru, watuliisa obu tukaba tuli omu irungu, kandi watuha ensi enu enungi muno. Baitu tukakusiisira emirundi nyingi muno. Okatusindikira banabbi bawe kutuhabura, baitu tutabahuliirize. Baitu nabwo okatugumiisiriza. Okagumira ha murago gwawe ogu wahaire Iburahimu. Kandi hati nitukuraganiza ngu nitwija kukworobera.’ Okweraga kwabo bakakuta omu buhandiiki, kandi ababiito, Abalevi, hamu n’abanyakatagara bataho emanyikirizo ha kihandiiko kyabo.