Израильчилерниң хөй кезии Иерусалимче эглип келгенинден бээр 70 хире чыл эрте берген. Ынчалза-даа чамдык израильчилер Персияның аңгы-аңгы черлеринге артып калгаш турган. Оларның аразынга Иегованың хоойлузун өөредип чораан Эзра дээр өргээ бараалгакчызы турган. Иерусалимниң чурттакчылары Хоойлуну сагывайн турар деп билип кааш, Эзра ынаар баар деп бодап алган. Персияның хааны Артаксеркс аңаа мынча дээн: «Улусту Хоойлуга өөредир кылдыр, Бурган сеңээ мерген угаанны берген-дир. Сээң-биле кады барыксаар улусту эдертип алгаш, ынаар чорувут». Эзра Иерусалимче чаныксаан улусту чыып алгаш, Иеговага мөргээш, орукче үнүпкеннер.

Олар дөрт ай болганда, Иерусалимге чедип келген. Тус черниң нояннары: «Израильчилер Иегованы дыңнавастаан. Олар дүрзү-бурганнарга чүдүүр кадайларга өгленип алган» — деп Эзрага чугаалаан. Эзра чон көрүп турда, дис кырынга олуруп алгаш, мөргээн: «Иегова, сен биске дыка хөйнү кылдың, а бис сеңээ удур бачыт үүлгедип тур бис». Улус буруузун миннинген-даа болза, оларга дуза дөмей-ле херек болган. Ынчангаш Эзра удуртукчулардан, баштыңнардан оларга дузалаарын дилээн. Ынчан Иеговага чүдүвейн турган улус Иерусалимден үш ай дургузунда чорупкан.

12 чыл эрткен. Ол үе дургузунда еврейлер Иерусалимни долгандыр хананы тудупкан. Бир хүн Эзра Бурганның Хоойлузун номчуур дээш, чонну кол шөлге чыггаш, номну ажыдыптарга, бүдүн чон туруп келген. Ол Иеговага четтиргенин илередирге, улус ооң-биле чөпшээрежип, холдарын өрү көдүрген. Оон Эзра Хоойлунуң утказын тайылбырлаарга, улус ону кичээнгейлиг дыңнааш, Иеговадан база катап кайы хире ырай бергенин билип, ыглажып эгелээннер. Дараазында хүн Эзра Хоойлуну  улаштыр номчаан. Улус Майгыннар байырлалының чоокшулап орарын билип кааш, аңаа белеткенип кирипкеннер.

Байырлал чеди хонук уламчылаан. Улус өөрүп, эки дүжүт дээш Иеговага четтиргенин илередип турган. Нуннуң Оглу Иисустуң үезинден тура ындыг Майгыннар байырлалы черле болуп көрбээн. Байырлал соонда олар мынча деп мөргээн: «Иегова, сен бисти кулданыгдан хостадың, ээн кургаг ховуга бисти чемгерип чордуң база биске бо кайгамчык черни бердиң. А бис сээң хоойлуларыңны катап-катап үреп турдувус. Медээчилериңни чоргустуң, ынчалза-даа бис тооп дыңнавадывыс. Биске шыдамык болуп, Авраамга берген аксы-сөзүң ээлээн сен. Ам сеңээ дыңнангыр боор бис деп аазап тур бис». Олар ол аазаашкынын бижип алырга, нояннар, левиттер, өргээ бараалгакчылары таңмазын салган.