Pa pitile ale 70 kanyamo tunde eci va Isareli valua va tiukila ko Yerusalãi, pole, omanu vakuavo handi va kala kolonepa vikuavo Viuviali wo Persia. Umue pokati komanu vaco, wa kala ocitunda cimue o tukuiwa hati Esera, una wa enda oku longisa Ocihandeleko ca Yehova. Esera wa yeva okuti omanu ko Yerusalãi ka va kaile oku pokola Kocihandeleko kuenje wa yonguile oku endako oco a va kuatise. Soma Aretasesete wo ko Persia wo sapuila hati: ‘Suku wa ku ĩha olondunge oco o pondole oku longisa Ovihandeleko viaye. Kuende, ambata omunu wosi o yongola oku enda love.’ Esera wa liongolola lomanu vosi va yonguile oku tiukila ko Yerusalãi. Ovo va likutilila ku Yehova oco a va popele vokuenda kungende kuenje va fetika oku linga ungende.

Noke yolosãi vikuãla, va pitĩla ko Yerusalãi. Olombuale via sapuila Esera hati: ‘Va Isareli va sinila Yehova kuenda va kuela akãi va fendela olosuku viesanda.’ Nye Esera a linga? Kovaso omanu, Esera wa kekama kolongolo kuenje wa likutilila hati: ‘A Yehova wa siata oku tu lingila ovina vialua, pole, etu tua siata oku ku lueyela.’ Omanu va likekembela, pole, handi va kala oku linga ovina ka via sungulukile. Esera wa nõla akulu kuenda olonganji oco va tetulule ovitangi viaco. Vokuenda kuolosãi vitatu via kuamamo, omanu vana ka va kaile oku fendela Yehova va tumiwa oku tiukila.

Pa pita anyamo ekũi lavali. Kotembo yaco, ovimbaka via ñualele o Yerusalãi via tumbuluiwa. Kuenje Esera wongoluila omanu vokololo oco a va tangele Ocihandeleko ca Suku. Eci Esera a yulula elivulu, omanu va talama. Eye wa sivaya Yehova kuenje omanu va votola ovaka avo ndocindekaise coku tava. Noke Esera wa tanga ocihandeleko loku ci lombolola kuenje omanu va yevelela lutate. Ovo va litavela okuti va silepo oku vumba Yehova kuenje va lila. Keteke lia kuamamo, Esera wa va tangela vali Ocihandeleko. Ovo va yeva okuti ndopo va laikele oku linga Ocipito Colosinge. Kuenje va fetika oku lipongiyila ocipito caco.

 Vokuenda kuoloneke epanduvali viocipito, omanu va sanjuka kuenda va eca olopandu ku Yehova omo lioku va sumũlũisa koku ungula kuwa. Ka kua la kala Ocipito cimue Colosinge ndeci, tunde koloneke via Yehosua. Noke yocipito omanu va liongolola kuenje va likutilila vati: ‘A Yehova, ove wa tu popela kupika, wa tu tekula eci tua kala vekalasoko kuenda wa tu ĩha ofeka eyi ya posoka.’ Pole, olonjanja viosi tua enda oku ku lueyela. Ove wa tuma ovaprofeto oco va tu lungule, pole, etu ka tua pokuile. Ndaño ndoco, wa lekisa epandi kokuetu. Ove wamamako oku tẽlisa ohuminyo yove ku Avirahama. Kaliye tu likuminya okuti tu pokola kokuove.’ Ovo va soneha ohuminyo yavo kuenje olombuale va Lewi kuenda ovitunda va kapa ondimbukiso kohuminyo yaco.