O te omarẹ ẹgbukpe 70 re rẹ ihwo rẹ Izrẹl buebun vwo rhivwin kpo Jerusalẹm, ẹkẹvuọvo evo je dia asan sansan rẹ ihwo rẹ Pẹsha suẹn. Ọvo usun rayen yen orherẹn re se Ẹzra rọ dia oyono rẹ Urhi rẹ Jihova. Ọke ro vwo nyo nẹ ihwo rẹ Jerusalẹm nene Urhi na-a, o de vwo ẹwẹn rọ vwọ yanran ra chọn ayen uko. Ovie Artaxerxes rẹ Pẹsha da vuẹ: ‘Ọghẹnẹ kẹ wẹ aghwanre rere wo vwo yono Urhi rọyen. Yanran, wẹ vẹ kohwo kohwo rọ guọnọ nene uwe.’ Ẹzra vẹ ihwo re guọnọ nene ejobi de koko. Ayen da nẹrhovwo nẹ Jihova sẹro rayen vwẹ oyan na, ayen da ro idjerhe.

Ọ reyọ emeranvwe ẹne ayen ki te Jerusalẹm. Isun na da vuẹ Ẹzra: ‘Ihwo rẹ Izrẹl na churhi rẹ Jihova, ayen rọvwọn eya re ga edjọ.’ Die yen Ẹzra ruru? Vwẹ irharo rẹ ihwo na, Ẹzra de shiguẹ ọ da nẹrhovwo: ‘Jihova, wo ru erọnvwọn buebun kẹ avwanre, ẹkẹvuọvo avwanre ru umwemwu vwọso owẹ.’ Ihwo na de kurhẹriẹ, dedena ayen ji ru obo ri je fo. Ẹzra da sane ekpako vẹ iguẹdjọ nẹ ayen vwẹrote ẹdia nana. Emeranvwe erha vwọ wan nu, a da djẹ ihwo re ga Jihova-a nẹ ohri rayen.

Ẹgbukpe ihwivẹ da rhe wanvrẹ. Uvwre rẹ ọke yena, jẹ a rhoma bọn igbẹhẹ rẹ Jerusalẹm. Ẹzra de koko ihwo na vwẹ otafe o vwo se Urhi rẹ Ọghẹnẹ kẹ ayen. Ẹzra vwo rhie ọbe na, ihwo na de vrẹn mudia. O de jiri Jihova, ayen eje da kpare abọ rayen kpenu. Ẹzra de se Urhi na ji djefiotọ kẹ ayen, ihwo na da nabọ kerhọ. Ayen da mrẹvughe nẹ ayen rhoma bo ghwru nẹ ẹbẹre rẹ Jihova re, ayen da viẹ. Ẹdẹ ochekọ, Ẹzra de ji se Urhi na kẹ ayen kpobarophiyọ. Ayen de yono nẹ ofori ayen ru Orẹ rẹ Ọgarivi na. Kpakpata, ayen de muegbe vwọ kẹ orẹ na.

Orẹ na reyọ ẹdẹ ighwrẹn, ihwo na da ghọghọ je kpẹvwẹ Jihova fikirẹ omamọ rẹ orhọ rayen. A je  mrẹ oka rẹ Orẹ rẹ Ọgarivi tiọyen vwo nẹ ọke rẹ Joshua rhe-e. Orẹ na vwo re nu, ihwo na de koko ayen da nẹrhovwo: ‘Jihova, wẹ yen sivwin avwanre nẹ eviẹn, wẹ yen ghẹrẹ avwanre vwẹ aton, wẹ yen je kẹ avwanre otọ oyoyovwin nana. Ẹkẹvuọvo, ọke buebun yen avwanre vwo gbe we kuẹ. Wo ji emraro wẹn rhe kẹ avwanre orhọ-esio, jẹ avwanre kerhọ-ọ. Dedena, wo ji vwo odirin rẹ avwanre. Wo ru obo wo ve kẹ Ebraham. Asaọkiephana, avwanre veri nẹ avwanre che nyupho wẹn.’ Ayen de si ive rayen na phiyotọ, isun na, emọ rẹ Livae, vẹ irherẹn na da vwẹ ute vwo te.