Ho vha ho no fhela miṅwaha i ṱoḓaho u vha 70 u bva tshee Vhaisiraele vhanzhi vha vhuyelela Yerusalema, fhedzi vhaṅwe vho vha vha tshi kha ḓi dzula fhethu ho fhamba-fhambanaho Muvhusoni wa Peresia. Muṅwe wavho o vha e tshifhe we a vha a tshi pfi Esera, we a funza Mulayo wa Yehova. Esera a pfa uri vhathu Yerusalema vho vha vha sa khou tevhedza Mulayo, nahone a ṱoḓa u ya u vha thusa. Arithasasitha Khosi ya Peresia a mu vhudza a ri: ‘Mudzimu o ita uri ni ṱalifhe uri ni kone u funza Mulayo wawe. Tshimbilani, nahone ni dzhie vhane vha ṱoḓa u ṱuwa na inwi.’ Esera a ṱangana na vhoṱhe vhe vha vha vha tshi ṱoḓa u vhuyelela Yerusalema. Vha rabela Yehova uri a vha tsireledze kha lwonolwo lwendo lulapfu, nahone vha mbo ḓi takuwa.

Nga murahu ha miṅwedzi miṋa, vha swika Yerusalema. Vhahulwane henefho vha vhudza Esera vha ri: ‘Vhaisiraele a vho ngo thetshelesa Yehova nahone vho vhinga vhasadzi vhane vha gwadamela midzimu ya mazwifhi.’ Esera a ita mini? Esera a gwadama nga magona phanḓa ha vhathu, nahone a rabela a ri: ‘Yehova, wo ri itela zwithu zwinzhi, fhedzi ro u khakhela.’ Vhathu vha rembuluwa, fhedzi vho vha vha tshi kha ḓi ita zwithu zwo khakheaho. Esera a nanga vhahulwane na vhahaṱuli u ri vha sedzuluse enea mafhungo. Kha miṅwedzi miraru i tevhelaho, vhe vha si gwadamele Yehova vho pandelwa.

Ha fhela miṅwaha ya fumimbili. Nga tshenetsho tshifhinga, mbondo dzo tangaho Yerusalema dzo vha dzo no fhaṱululwa. Esera a kuvhanganya vhathu mudavhini uri a vha vhalele Mulayo wa Mudzimu. Musi Esera a tshi vula bugu, vhathu vha takuwa. Vha renda Yehova, vha tendelana nga u imisela zwanḓa nṱha. Nga zwenezwo Esera a vhala Mulayo na u u ṱalutshedza, nahone vhathu vha thetshelesa vhukuma. Vha tenda u ri vho vha vha si tsha thetshelesa Yehova, nahone vha lila nga maanḓa. Nga matshelo, Esera a dovha a vha vhalela zwiṅwe kha Mulayo. Vha pfa uri hu si kale vha fanela u pembelela Vhuṱambo ha Mishasha. Vha mbo ḓi thoma u lugisela honoho vhuṱambo.

 Kha maḓuvha a sumbe a vhuṱambo, vhathu vha takala vha livhuha Yehova nge a vha fha khaṋo yavhuḓi. Ho vha hu sa athu u vhuya ha vha na Vhuṱambo ha Mishasha vhu fanaho na honoho u bva tsha maḓuvhani a Yoshua. Nga murahu ha vhuṱambo, vhathu vha kuvhangana vha rabela vha ri: ‘Yehova, wo ri bvisa kha vhupuli, wo ri fha zwiḽiwa sogani, wa ri fha shango ḽo nakaho. Fhedzi ra si u thetshelese lunzhi-lunzhi. Wo ruma vhaporofita u ri kaidza, fhedzi ri si pfe. Wa si ri fhelele mbilu naho zwo ralo. Wo ita zwe wa fulufhedzisa Abrahamu. Zwino ri khou fulufhedzisa uri ri ḓo u pfa.’ Vha ṅwala fhasi zwe vha fulufhedzisa, nahone vhahulwane, Vhalevi, na vhotshifhe vha ganḓisa nga luswayo lwavho.