Mga 70 ka tuig na an naglabay tikang han binalik ha Jerusalem an kadam-an nga Israelita, pero an iba naukoy la gihap ha iba-iba nga bahin han Imperyo han Persia. Usa hito an saserdote nga hi Esra nga nagtutdo han Balaud ni Jehova. Hinbaroan niya nga diri ginsusunod han katawohan ha Jerusalem an Balaud, ngan karuyag niya kumadto basi buligan hira. An hadi han Persia nga hi Artaherhes nagsiring ha iya: ‘Ginhimo ka han Dios nga maaramon para maitutdo mo an iya Balaud. Kadto, ngan iupod an bisan hin-o nga karuyag umupod ha imo.’ Nakigkita hi Esra ha ngatanan nga karuyag bumalik ha Jerusalem. Nag-ampo hira kan Jehova nga proteksyonan hira ha ira hirayo nga biyahe, tapos lumakat hira.

Paglabay hin upat ka bulan, inabot hira ha Jerusalem. An mga prinsipe didto nagsiring kan Esra: ‘Diri ginsusunod han mga Israelita hi Jehova ngan nag-asawa hira hin kababayin-an nga nagsisingba ha buwa nga mga dios.’ Ano an ginbuhat ni Esra? Ha atubangan han katawohan, linuhod hiya ngan nag-ampo: ‘Jehova, damu gud nga kaopayan an imo ginhimo ha amon, pero nakasala kami ha imo.’ Nagbasol an katawohan, pero nagbinuhat la gihap hira hin sayop. Nagpili hi Esra hin katigurangan ngan mga hukom basi panginanoon ito. Han sumunod nga tulo ka bulan, ginpaiwas nira an mga diri nagsisingba kan Jehova.

Linabay an 12 ka tuig. Hito nga panahon, natukod na utro an pader han Jerusalem. Salit gintirok ni Esra ha plasa an katawohan basi basahon ha ira an Balaud han Dios. Han gin-abrihan ni Esra an libro, nanindog an katawohan. Gindayaw nira hi Jehova, ngan ira gin-alsa an ira mga kamot sugad nga pag-uyon. Katapos, ginbasa ngan ginsaysay ni Esra an Balaud, ngan an katawohan namati hin maopay. Ginkarawat nira nga nagpahirayo na liwat hira kan Jehova, ngan nagtangis hira. Kinabuwasan, padayon nga ginbasa ni Esra an Balaud. Hinbaroan nira nga ha diri na maiha, sadang nira isaurog an Piyesta han mga Payag. Salit nangandam dayon hira para hito.

Ha sulod han pito ka adlaw nga piyesta, nagkalipay an katawohan ngan nagpasalamat kan Jehova para ha  mabungahon nga ani. Waray pa nahitabo nga sugad hito nga pagsaurog han Piyesta han mga Payag tikang ha panahon ni Josue. Katapos han piyesta, nagtirirok an mga tawo ngan nag-ampo: ‘Jehova, gintalwas mo kami tikang ha pagkauripon, ginpakaon ha disyerto, ngan gintagan hinin maopay nga tuna. Pero pauroutro nga waray ka namon sugta. Nagsugo ka hin mga propeta basi pahamangnoan kami, pero waray kami mamati. Bisan pa hito, nagpailob ka. Gintuman mo an imo saad kan Abraham. Yana, nagsasaad kami nga susundon ka namon.’ Ginsurat nira an ira saad ngan ginselyohan ito han mga prinsipe, mga Levita, ngan mga saserdote.