Ná ma godudy 70 íz de goló bibiguet xidal israelitas Jerusalén, tipnésyibu goyoʼsayibu lainy gudx Persia. Toibtica israelita ni goyoʼ gudx Persia góc laa Esdras, láabu gócbu toib sacerdote ni bisuidy buñ ni ná Xiley Jehová. Esdras gon que israelitas ni goyoʼ Jerusalén diti casobyibu Xiley Dios. Por ngú nábu ñeebu Jerusalén par ñacnébu buñ ni goyoʼ cú. Artajerjes, ni buny mandary gudx Persia góoch láabu: «Dios biduidy galnann looy par guisuidylo buñ ni ná Xiley Dios. Por ngú goyee né goyné nitisi buñ ni gaiby tzee né looy». Esdras bitopbu guirá buñ ni ná ñee Jerusalén né gonabyibu Jehová ñan layibu ló néz. Né goyoʼyibu néz goyeeyibu Jerusalén.

Ló tap beʼo bidxinyibu Jerusalén. Guirá príncipes gochyibu Esdras: «Buñ israelitas diti casobdiitzyibu ni ná Jehová né ma bunyibu galtzeʼel né buñgonaʼ ni cayen dioxh falz». ¿Xí buny Esdras ór cú? Nisló gudxcú bixixipbu né goninébu Dios scareʼ: «Jehová, looy ma bunylo xidal cós par gocnélo lóodo, per lóodo ma bunydo galkié nislólo». Buñ israelitas góc arrepentiryibu, per ná scú biquiinyibu galrracné par ñonyibu xinésni. Por ngú Esdras golú tipnés ancianos né jueces par ñanyibu xigony diti bisianyibu cós mal ni bunyibu. Gocla tzón beʼo par goleʼyibu buñ ni diti gosaguel ñen Jehová lainy gudxcú.

Godudy 12 íz, né muros xtuny Jerusalén golísyibu láani stoib. Esdras bitopbu guirá buñ né bíilbu Xiley Dios par nacadiagyibu. Órni bixalbu Leycu, guirá buñ gosagaʼ. Esdras bunyxiroʼbu Jehová né guirá israelitas golísyibu ñayibu né modcu bislooyibu que goyoʼyibu de acuerdo né ni goniʼ Esdras. Después, Esdras bíilbu né golexabu ni ná Ley. Guirá buñ bicadiagtzay né biduidyibu cuent que ma golsityibu de Jehová stoib né dada gorudxaʼyibu. Stoib dzúcu, Esdras bíilrabu ni ná Ley. Israelitas biduidyibu cuent que ma yaaca guidxin dzú ni gonyibu Lanii lainy Ramad. Órcuca gosaló bunyibu puext par gonyibu laniicu.

 Israelitas goyoʼ nakityibu ló gatz govitz ni gocla laniicu. Biduidyibu guixquix a Jehová portín bitopyibu xcaa guirá ni bidxiʼpyibu. Último ni buny laniicu góc Josué, después de ngú godudy xidal íz par buny Esdras láani. Órni bilox laniicu, bidopyibu né goninéyibu Jehová scareʼ: «Jehová, looy goleʼlo lóodo xan xomandary Faraón. Biduidylo ni godódo ló yoovich né biduidylo layoo móz reʼ lóodo. Per xidal buelt diti bisobdo looy. Ná bixelo xidal profetas ni góoch lóodo nasiando cós mal, diti goloʼdo cuent layibu. Ná scú, looy goplo paseinys lóodo. Diti bialadxlo diitz ni gochlo Abrahán. Nigoreʼ raduidydo xtiitzdo guisobdiitzdo looy». Bicaʼyibu ló guiich ni goniʼyibu gonyibu, né guirá príncipes, levitas né sacerdotes bicaʼyibu sello láani.