Mä qhawqha maranak nayrar kuttʼañäni. Persiankir Susa markanjja Nehemías sat mä israelitaw jakäna. Jupajj Artajerjes reyin serviripänwa. Mä urojja Nehemiasan jilapaw Judá oraqet jan wali yatiyäwimpi purinïna, akham sasa: ‘Jerusalenar kuttʼir israelitanakajj janiw jarkʼaqatäpkiti. Babilonionakan allthapit perqanakasa punkunakasa janïraw tukuyatäkiti’ sasa. Nehemiasajj wal llakisïna, yanaptʼañwa munarakïna, ukatwa ‘reyejj Jerusalenar khitakitaspa’ sasin orasïna.

Qhepatjja reyejj Nehemiasar llakit uñjasajj akham sänwa: ‘Janipuniw ukham llakit uñjirïksmati. ¿Kunas pastam?’ sasa. Nehemiasajj sarakïnwa: ‘Jerusalén markajajj qʼala tʼunjatawa, ¿kunjamarak jan llakiskästi?’ sasa. Reyejj ‘¿kunjamsa yanaptʼirisma?’ sasaw jisktʼäna. Ukatwa Nehemiasajj chuymapan ortʼasïna. Ukat akham sänwa: ‘Mirä amp suma, perqanakap mayampi lurañatak Jerusalenar khitita’ sasa. Artajerjes reyejj sarañapatakiw permiso churäna. Jerusalenar sarkasin jan kuna jan walis pasañapatakiw yanaptʼarakïna. Ukatsti Judá markan gobernadorat serviñapatakiw uttʼayäna, Jerusalenan punkunakap lurañatakis maderanakwa churarakïna.

Nehemías chachajj Jerusalén markar purïna ukhajja, perqanakap uñjiriw saräna. Ukatsti sacerdotenakaru, marka apnaqerinakaru tantachthapisaw akham säna: ‘Jan waltʼañanwa uñjastanjja. Markan perqanakap saytʼayañasawa’ sasa. Markankirinakajj walïspawa sasaw sapjjäna, ukatjja perqanak mayamp lurañwa qalltapjjäna.

Yaqhep enemigonakapajj israelitanakat larusipjjänwa, akham sapjjarakïnwa: ‘Lurasipkta uka perqjja, mä zorros allthapispawa’ sasa. Ukampis israelitanakajj jan yäqasaw lurasipkakïna. Ukhamatwa perqanak jachʼaptayasipkakïna, sum saytʼayapjjarakïna.

Ukatsti walja cheqanakatwa enemigonakapajj mä akatjamat israelitanakar nuwantañatak sarañ amtapjjäna. Uk yatisajja judionakajj ajjsarapjjänwa. Ukampis Nehemiasajj akham sänwa: ‘Jan ajjsarapjjamti. Jehová Diosaw jiwasampïski’ sasa. Ukatjja guardianakwa trabajisipki ukanakar jarkʼaqañatakejj uchäna. Ukhamatwa enemigonakapajj jan kamachapkänsa.

 Markan perqanakapsa punkunakapsa, 52 urunakanakwa tukuyapjjäna. Uk fiestachañatakiw Nehemiasajj levitanak Jerusalenar irptanïna. Ukatsti cantapjjañapatakiw pä grupor jaljäna. Esdrasajj mä grupompiw saräna, Nehemiasasti mä grupompiw sararakïna. Perqa patjjar makatasaw mä grupojj maysnama, mayni grupojj maysnamaraki mark muytapjjäna. Trompetanak tuktʼasisa, címbalo sat instrumentonaka, arpanak tuktʼasisa, Jehová Diosatak canttʼasisaw sarapjjäna, templor puriñkama. Chachanakasa, warminakasa, wawanakasa taqeniw sacrificionak Jehová Diosar churapjjäna, wal fiestachapjjarakïna. Wali kusisitäpjjänwa, cantapjjatapas wali jayaruw istʼasïna.