Di tingki ni si Esra, adong ma sahalak baoa na margoar si Nehemia. Ibana sahalak pangurupi di istana ni Raja Artasasta. Di kota Susan na di Persia do ibana tinggal. Di sada tingki, ro ma sahalak keluarga ni si Nehemia sian Juda. Didok ma, ‘Ndang aman angka halak na mulak tu Jerusalem i. Alana, ndang dipadenggan dope tembok naung hancur i.’ Gabe lungun ma roha ni si Nehemia. Martangiang ma ibana asa diloas raja ibana tu Jerusalem laho mangurupi angka halak na disi.

Di sada tingki, marsak ma si Nehemia diida raja. Didok raja ma tu ibana, ‘Boasa marsak ho?’ Didok si Nehemia ma, ‘Lungun rohangku ala ndang dipadenggan dope tembok ni Jerusalem, hutangku.’ Disungkun raja ma, ‘Aha na boi huurupi?’ Martangiang ma si Nehemia di bagasan rohana. Dung i didok ma, ‘Loas ma ahu mulak tu Jerusalem padengganhon tembokna.’ Diloas ma ibana lao, jala disuru ma asa adong na manjaga ibana saleleng di pardalanan. Dibahen raja i ma ibana gabe gubernur ni Juda, jala dilehon ma angka hau tu ibana laho mambahen gerbang ni kota i.

Dung sahat si Nehemia di Jerusalem, dipareso ma tembok ni kota i. Dipapungu ma angka malim dohot angka pemimpin. Didok ma tu nasida, ‘Sega hian do tembok i. Ingkon tapadenggan do i.’ Dung i dipadenggan nasida ma tembok i.

Alai dilesengi angka musuna ma halak Israel. Didok ma, ‘Holan nangkok pe serigala tu tembokmuna i, sega do i.’ Alai ndang olo halak Israel manangihon i. Torus do nasida karejo. Lam timbo jala lam togu ma tembok i. 

Dung i, naeng ro ma musu ni halak Israel mangaroro nasida. Gabe mabiar ma nasida. Alai didok si Nehemia ma, ‘Unang mabiar hamu. Didongani Jahowa do hita.’ Dung i, disuru si Nehemia ma asa adong halak na manjaga angka parkarejo na mambangun tembok i. Alani i, ndang boi be angka musu ni nasida mangganggu.

 Ujungna sae ma tembok i dohot gerbangna holan 52 ari. Diajak si Nehemia ma sude halak Lepi tu Jerusalem laho meresmihon tembok i. Sude halak mangalehon persembahan tu Jahowa jala marlas ni roha. Dibahen si Nehemia ma dua punguan parende. Na sada punguan, rap dohot si Esra. Jala na sada punguan nai, rap dohot si Nehemia. Nangkok ma nasida tu tembok i. Mardalan ma nasida mangkalilingi kota i huhut marende. Na sada punguan tu kanan jala na sada nai tu kiri sahat tu na pajumpang nasida di bagas joro. Tarbege ma soara ni nasida sahat tu na dao.