Bi tame bulane mvus mone jôm. Néhémie, mbo ésaé Njô bôt Artaxerxès a mbe mone Bejuif; a mbe a nyiñe tisone ya Perse ba loone na Suse. Môs éziñ monyañe wé a nga soo nye mbia foé e Juda, a jô’ô na: ‘Bôte be nga bulane Jérusalem be tele minju’u été. Be ngenane te lôñ mimfin Bebabylonien be nga bôé.’ Néhémie ve zu wô’ô ôlun. A mbe a kômbô’ô ke Jérusalem na a ke volô be, ane a nga ye’elane Yéhôva na a bo na, njôô bôt a jô’é nye a ke.

Mvuse ya valé, njô bôt a nga yen asu Néhémie e too nye ntiñetan. Ane a nga jô nye na: ‘Me ngenane te yene wo ana. Jé ja lôt?’ Néhémie a nga jô nye na: ‘Ma ye bo te wô’ô ôlun aya? Tisone jam, Jérusalem, é ne ntyaman.’ Ane njôô bôt a nga sili nye na: ‘Jé me ne bo asu na me volô wo?’ Néhémie ve ji’a ye’elane Yéhôva nlem été. Nde a nga jô njôô na: ‘Éngôngol, kañese’e na me ke lôñe mimfine ya Jérusalem.’ Ane Njô bôt Artaxerxès a nga kañese, a volô fe na te mbia jam a kui nye zen. A nga telé fe Néhémie ngovina ya Juda, a ve fe nye bilé asu mimbé ya Jérusalem.

Éyoñ Néhémie a nga kui Jérusalem, a nga taté ke a fombô mimfine ya tison. Éyoñ éte a nga sulane beprêtre a bivete, a jô be na: ‘Za aval ajô di! Bia yiane taté ésaé.’ Ane bese be nga kañese, a taté ésaé.

Ve besiñe bap be nga taté na ba kpwe’ele be, be jô’ô na: ‘Ja’a mvak é ne bôé mimfin mia lôñe le.’ Ve be nga kee ésaé jap ôsu, teke bisi be. Mfin ôte ô mbe ô yeme’, ô too fe ôyabe yôp.

Besiñe bap be nga bo éso’o na ba ye zu wosane be atemetem. Éyoñ Bejuif be nga wô’ô de, be nga taté na ba ko woñ. Ve Néhémie a nga jô be na: ‘Te mia ko woñ. Yéhôva a ne a bia.’ Ane a nga telé bôte béziñ na be  ba’ale bebo bisaé, asu na te besiñe bap ba bo be mbia jam.

Mvuse melu 52, be nga mane lôñe mimfin a kôme mimbé. Ane Néhémie a nga bañete Belévite bese Jérusalem na be bo abôk. A nga kandé be ngab ébaé na be yia bia. Ane be nga lôt mbé ya Anjeñ, a bet ôbete ya nlame David, be wulu’u na be zu tôban. Be mbe be yi’a Yéhôva bia be loñe metoñ, be bôme’e bingombé a memvet. Esdras a mbe ngab ôsu, Néhémie ki ngabe fok, akekui be nga zu tôbane temple. Bôte bese, befam, binga, a bongô be nga vak a ve Zambe metuna’a. Be mbe be yi’a yôb été.