An k’a filɛ koo minw tun kɛra saan damanin tɛmɛninw na. Masacɛ Aritasɛrisɛsi ka baaraden Neemi tun ye Israɛlden ye min tun siginin be Suzi dugu la, Pɛrɛsiw ka mara la. Neemi balima dɔ nana ni kibaro gomanw ye ka bɔ Zuda. A ko: ‘Mɔgɔ minw kɔsegira Zeruzalɛmu, u latanganin tɛ. Babilonɛkaw ye dugu kogo n’a donda minw halaki, u ma lalaga fɔɔ bi.’ O ye Neemi dusu kasi. A tun b’a fɛ ka taga Zeruzalɛmu k’u dɛmɛ. O kama a ye delili kɛ walisa masacɛ ka sira di a ma.

Kɔfɛ, masacɛ y’a ye ko Neemi ɲɛɛ sisinin lo. A ko: ‘Ne ma deli k’i ye nin cogo la. Mun lo kɛra?’ Neemi ko: ‘Ka ne ka dugu halakinin to, ne dusu be se ka diya cogo di?’ Masacɛ y’a ɲininga ko: ‘I be mun lo fɛ?’ Neemi sinna ka delili kɛ a kɔnɔ. O kɔ, a ko: ‘Sabari ka sira di yan n’ be taga Zeruzalɛmu laminikogow lɔ kokura.’ Masacɛ Aritasɛrisɛsi ye sira di a ma. A ye labɛnw kɛ walisa ka la a la ko Neemi bena a ka tagamajan kɛ hɛɛrɛ la. A ye Neemi kɛ a ka lasigiden ye fana Zuda kun na ani a ye yiriw di a ma ka dugu donda koonw dilan.

Neemi senin kɔ Zeruzalɛmu, a yaalala ka dugu laminikogow filɛ. O kɔ, a ye sarakalasebagaw ni kuntigiw lajɛn k’a fɔ u ye ko: ‘Nin ye gwɛrɛgwɛrɛko ye. An ka wuli ka baara daminɛ.’ Jama sɔnna ani u y’a daminɛ ka kogow lɔ kokura.

Nka Israɛldenw ka jugu dɔw y’u lɔgɔbɔ k’a fɔ ko: ‘Aw be kogo min lɔra, kongowulu be se k’a ben.’ Baarakɛlaw m’u janto o nɛniniw la, nka u tora ka lɔli kɛ. Kogo janyana ani a barika bonyana kosɔbɛ.

Juguw y’a latigɛ ka tɛmɛ sira dɔw fɛ dan na dan na ka taga bari Zeruzalɛmu mɔgɔw la walisa k’u kɛlɛ. Yahutuw y’o mɛn minkɛ, u siranna. Nka Neemi y’a fɔ u ye ko: ‘Aw kana siran, Jehova be n’anw ye.’ A ye garadiw bila ka baarakɛlaw tanga. O sen fɛ, juguw ma se k’u kɛlɛ.

 Kogow ni donda koonw baara banna tile 52 dɔrɔn kɔnɔ. Neemi ye Levitew bɛɛ weele ka na Zeruzalɛmu o baara kɛnin ɲɛnagwɛ la. A y’u kɛ dɔnkililabagaw ye ani k’u tilan yɔrɔ fila. O jɛnkulu fila nunu tɛmɛna ni ɛsikaliyew ye, minw be jii bɔyɔrɔ fan fɛ, ka yɛlɛ kogo kan. U dɔw tagara faan dɔ fɛ, dɔ wɛrɛw tagara faan wɛrɛ fɛ. U tagamana ka dugu lamini, ka to ka buru fiyɛta, kolonjow ni ngɔniw fɔ ka dɔnkili la Jehova ye. Ɛsidirasi ye jɛnkulu kelen ɲɛminɛ ani Neemi ye tɔɔ kelen ɲɛminɛ. U tagara ɲɔgɔn kunbɛn Alabatosoba kɔnɔ. Jama bɛɛ, cɛɛw fara musow ni denmisɛnw kan, u bɛɛ ye saraka bɔ Jehova ye ani ka ɲɛnagwɛ. U ninsɔndiya kaan tun be mɛn fɔɔ yɔrɔjan na.