Maa chakai waaʼin soʼutpünaa tü kaʼikat süpülapünaa süshaʼwaleʼennüin süsepü Jerusalén. Nehemías nia wanee israeliita kepiapuʼukai chaa Persia suluʼu tü mmakat Susa. Aʼyataai nia nümüin chi aluwataashikai Artajerjes. Soʼu wanee kaʼi, antüshi Judájee wanee nuwala Nehemías sümaa wanee pütchi nnojotka anain. Anuu nünüiki: «Na israeliita aleʼejakana Jerusalénmüin nnojotsü kasain aaʼinmajüin naya. Tü süsepükat otta tü supuettoʼuse najaʼttirakat na chejeʼewaliikana Babilonia, nnojotsü akumajünüin shia süchikuaʼa». Mojukaʼa maʼin naaʼin Nehemías. Nükaaliinjeein naya, müshijeseʼe nuchuntuin nümüin Jeʼwaa süpüla nuuʼulaain nia chi aluwataashikai süpüla nuʼunuinjachin Jerusalénmüin.

Niʼraka Artajerjes mojuin maʼin naaʼin Nehemías. «Nnojoiyüiya pia teʼrüin sünain maa. ¿Jamüshi pia?», nümaka nümüin. Nusoutaka Nehemías nümüin: «Ojuichijaasü süsepü tü tapueulosekat Jerusalén, ¿jamakaʼa nnojoluinjatka mojuin taaʼin?». Nüsakiraka nia chi aluwataashikai: «¿Kasa eeka süpüla takaaliinjain anain pia?». Wanaa sümaa tia, oʼuraajüshi Nehemías nüleʼeruʼu nümüin Jeʼwaa. «Anashi puuʼulaale toʼunuin Jerusalénmüin takumajaiwa süchikuaʼa süsepü tia pueulokot», nümaka nümüin chi aluwataaikai. Nuuʼulaaka Artajerjes nuʼunuin Nehemías otta naapüin nümüin tü kasa choʼujaweetkat nümüin wopuluʼu. Niʼitaain Nehemías süpüla sülaülaainjachin Judá otta naapüin nümüin taapüla süpüla nukumajirüin supuettoʼuse Jerusalén.

Nüntapa Nehemías Jerusalénmüin, oʼunamaatüshi nia sünain anaʼlawaa süsepü tü pueulokot. Nuutkajeʼeraka na sacerdootekana namaa na laülaashiikana. «Nnojotsü anain müle wakuwaʼipa, acheküshii waʼyataainjanain maʼin», nümaka namüin. Anashiisü noʼuluʼu tia na wayuukana otta noʼttaka sünain akumajaa süsepü Jerusalén.

Naapapa naʼünüü na israeliitakana sünain sukumajünüin süsepü Jerusalén, nemeeʼerainpalashii naya. «Eesü süpüla sujuichijeʼerüin wanee walirü türa jukumajakat», müshii namüin. Nnojotpajaʼa jülüjain naaʼin na aʼyataaliikana tü namakat, ountaashii naya sünain aʼyatawaa. Miyoʼu miyoʼu müsü shiʼipaʼaya süsepü tia pueulokot natuma sümaa kaʼlein maʼin shia.

Naashajaajiraaka naʼünüü na israeliitakana süpüla nashutuin saaʼu Jerusalén. Natüjaapa saaʼu tia na israeliitakana, eimmolojooshii naya. «Nnojo mmoluin jia. Eeshi Jeʼwaa wamaa», nümaka Nehemías namüin. Nuluwataaka Nehemías surulaat  süpüla naaʼinmajüin na aʼyataashiikana. Nnojoishii naya jamajüin natuma na naʼünüükana.

Kettaasü natuma süsepü Jerusalén sümaa tü puettoʼukot soʼu 52 kaʼi. Neenajitka Nehemías napüshuaʼa na leviitakana süpüla naaʼinrüin miʼiraa shikiira sujutaain tü aʼyatawaakat. Piamasü nutuma Nehemías neʼipapaʼa na eeʼirajüliikana. Nümaashii Nehemías wanee neʼipapaʼa otta wane, nümaashii Esdras. Oʼotooshii naya saaʼupünaa sükaleerase supuettoʼuse tü wüinkat. Süchikijee, napaajiraaka jee noʼunaka saaʼupünaa süsepü Jerusalén. Naʼyalajirüin tü trompetakat, tü címbalokot otta tü arpakat. Eeʼirajüshii naya nümüin Jeʼwaa jee outkajaashii naya mapa eere tü piichi aʼwaajüleekat Maleiwa. Na tooloyuukana, na jieyuukana otta na tepichikana, aʼajüshii mürüt nümüin Jeʼwaa otta naaʼinrüin tü miʼiraakat. Talatashaatasü naaʼin sümaa jaʼyain neeʼirain wattajee.