Ngatu yaruke ozombura ozonḓiṱi kombunda. Nehemia, omukarere wOmbara Artakerkes, wa ri Omuisrael ngwa turire moPersie motjihuro tjaSusa. Omuangu waNehemia wa za koJuda nombuze ombi ndjaai tja: ‘Ovandu mba yaruka koJerusalem kave ri mondjeverero. Otumbo nomivero Ovababilon mbi va nyona ngamba kavi ya tungururwa.’ Nehemia wa wire momuinyo. Eye aa vanga okuyenda koJerusalem okukavatera, nu otja kumba kutja ombara i mu yandjere okuyenda.

Kombunda yanao, ombara ya muna kutja Nehemia wa u momuinyo. Oyo ya tja: ‘Ami hi ya rora okukumuna mongaro otja indji. Wa hapa vi?’ Nehemia wa tja: ‘Ongwaye tji mbi hina okuwa momuinyo ngunda otjihuro tjandje, Jerusalem, atja nyonwa?’ Ombara ya pura nai tja: ‘Otjikeṋa tji mo vanga kutja mbi ku tjitire?’ Tjimanga Nehemia otja kumba momuinyo, tjazumbo a tja: ‘Arikana ndji yandjera kutja mbi yende nu mbi katungurure orumbo rwaJerusalem.’ Ombara Artakerkes ya raera Nehemia okuyenda, nu ya tjita kutja eye ma kare nondjeverero mouyenda we oure. Eye wa zika Nehemia okurira omuhongore moJuda ne mu pe omiti ma kaungure na vyo omivero vyotjihuro.

Indu Nehemia tja vaza moJerusalem, eye wa katara otumbo twotjihuro. Okuzambo wa woronganisa ovapristeri novanane na tja ku wo: ‘Tareye oumba mu tu ri mbwi! Ngatu tungurire otumbo.’ Ovandu va itavera nu owo va uta okutungurura otumbo.

Posiya ovanavita tjiva vOvaisrael va uta okuvetjita ouhahu, nave tja: ‘Nandarire ombandje tji ye rivete morumbo ndo maru wire pehi!’ Ovatunge kave yandjere ombango komambo wawo, owo va kayenda komurungu okutunga. Otumbo twa rira oture notunamasa.

Ovanavita ve ripura kutja mave ya nondjira yarwe okuyekurwisa Jerusalem ngunda Ovaisrael ave hina okuundjira ko. Indu Ovajuda tji va zuva ohunga nondando ndjo, owo va tira tjinene. Posiya Nehemia wa tja ku wo: ‘Amu tira Muhona u ri puna eṱe.’ Eye wa zika ovatjevere okuyama ovaungure, nu ovanavita kaave yenene okuverwisa.

 Momayuva 52, otumbo nomivero vya manuka okutungwa. Nehemia wa eta Ovalevi avehe koJerusalem komayapuriro wotumbo. Eye we ve twa movimbumba 2 vyovaimbure. Owo va ronda korumbo kozondondo nḓa ri pOmuvero wOruharwi, tjazumbo otjimbumba atjihe atji nḓerere okukondoroka otjihuro okuza komunda umwe. Owo aave nyanda ozohiva, ovihumba noviharpe nave imburire Jehova. Esra wa ya puna otjimbumba tjimwe nu Nehemia wa ya puna ihi otjikwao, ngandu tji va kahakaenena pOndjuwo Ondjapuke yaMuhona. Ovandu avehe ovarumendu, ovakazendu novanatje va yandja ozombunguhiro ku Jehova nu va kara nomukandi. Ombosiro yomaraka wawo wondjoroka aai zuvakwa okuza kokure.