Ve Mũisilaeli weetawa Neemia ũla waĩ mũthũkũmi wa Mũsumbĩ Alitasasita. Neemia ekalaa ndũanĩ ya Susani ĩla yaĩ ũsumbĩnĩ wa Velisia. Myaka kauta wĩa wa kwaka ĩngĩ ngũta sya Yelusaleme ũtanambĩĩa, Neemia nĩwataviwʼe ũvoo mũthũku kuma Yuta. Ũla wamũtavisye ũvoo ũsu nĩ mwana-a-inyia ũla waumĩte kũu na amwĩie atĩĩ: ‘Andũ ala manasyokie Yelusaleme ti asũvĩĩku. Ngũta sya Yelusaleme na mĩomo ĩla yaanangiwe nĩ Ambaviloni ndyaaĩsa kwakwa ĩngĩ.’ Ũndũ ũsu nĩwatumie Neemia amaka mũno. Nĩwendaa kũthi Yelusaleme nĩ kana akatetheesye wĩa ũsu, na kwoou amũvoya Yeova nĩ kana atume mũsumbĩ amũnenga mwanya athi.

Ĩvinda ĩkuvĩ ĩtina wa Neemia kũtavwʼa ũvoo ũsu mũthũku, o aendeee kũthũkũma mbee wa Mũsumbĩ Alitasasita, mũsumbĩ nĩwoonie Neemia emakĩe. Na kwoou mũsumbĩ amwĩa: ‘Ndyaaona ũilye ũu ĩngĩ. Nĩ kyaũ kĩũkũthĩnyʼa?’ Nake Neemia amũsũngĩa: ‘Nĩmakĩe nũndũ Yelusaleme, ĩla nĩyo ndũa yaitũ nĩyaanangiwe, na ndyaakwa ĩngĩ.’ Nĩvo ĩndĩ mũsumbĩ wamũkũlilye ĩngĩ: ‘Wĩenda ngũtetheesye ata?’ Ndatĩkanĩ o ĩsu, Neemia nĩwamũvoyie Yeova ngoonĩ. Na ĩndĩ eea mũsumbĩ atĩĩ: ‘Mwa nenge mwanya nĩthi Yelusaleme ngake ĩngĩ ngũta sya ndũa ĩsu.’ Mũsumbĩ Alitasasita nĩwamũnengie Neemia mwanya athi, na ĩndĩ aĩkĩĩthya kana vaiĩ kĩndũ kyaĩ kĩtonya kũmũũmĩsya e kyalonĩ kĩu kĩasa mũno. O na ũndũ ũngĩ nĩwanengie Neemia wĩa wa kwĩthĩwa ngavana wa Yuta, na amũnenga mbwaũ sya kũseũvya mĩomo ya Yelusaleme.

Yĩla Neemia wavikie Yelusaleme nĩwambie kũthyũlũlũka ĩ ndũa asyaĩtye ũndũ ngũta iilye. Amina, nĩwoombanisye athembi na atongoi na amea atĩĩ: ‘Ngũta ii siilye naĩ mũno. Nĩtwambĩĩei kũsyaka.’ Andũ nĩmeetĩkĩlile na mambĩĩa kwaka ĩngĩ ila ngũta.

Ĩndĩ amaitha amwe ma Isilaeli nĩmambĩĩie kũmathekeea, na mambĩlĩlya kwasya atĩĩ: ‘O na mbĩwa no ivalũkye ngũta ii mũkwaka.’ Andũ ala maakaa nĩmavũthĩĩisye ndeto isu na maendeea na wĩa woo. Ngũta nĩsyaendeeie na kũtũla syĩ ndũmu.

Yĩla amaitha ma Aisilaeli moonie maendeee na kwaka nĩmavangie kũmavithũkĩa matesĩ kuma ngalĩko syĩ kĩvathũkanyʼo. Yĩla Ayuti meewie kĩla amaitha asu mavangĩte kũmeka, nĩmatelemile mũno. Ĩndĩ Neemia ameie atĩĩ: ‘Mũikakĩe. Yeova e vamwe naitũ.’ Ĩtina wa ũu, Neemia nĩwanyuvie andũ amwe methĩwe asungi nĩ kana  masũvĩe andũ ala maendeee kwaka, na ũu nĩwatumie amaitha moo matamavithũkĩa.

Ĩtina wa mĩthenya 52, andũ ala maakaa nĩmaminie kwaka ngũta na mĩomo ya ndũa. Nĩvo ĩndĩ Neemia woosie Alivai nĩ kana moke kũtongoesya mboka ya kwonanyʼa kana ngũta na mĩomo ya ndũa ĩsu nĩthelile kwakwa. Nĩwamavangie ikundi ilĩ sya aini. Nĩmalĩsile na ngasi ũkũtanĩ ũsu ngalĩko ya Mbingĩlonĩ ya Nthongo ya Manzĩ, na ĩndĩ kĩla kĩkundi kyathi ngalĩko yakyo nĩ kana mathyũlũlũke ndũa ĩsu. Maendie mamwinĩĩte Yeova na maĩ na soo, tũsaya, na mbeve. Esala aendie na kĩkundi kĩmwe nake Neemia athi na kĩla kĩngĩ na mathyũlũlũka ndũa ĩsu nginya yĩla makomanĩie ĩkalũnĩ. Andũ onthe, aũme, aka, na syana nĩmamumĩisye Yeova nthembo na matana mũno. Mũndũ e vaasa aĩ atonya kwĩwʼa andũ asu mayina na maineena nũndũ wa ũtanu.