Omwa buthuku bwa Ezera, habya Omuisraeli iya Nehemia oyuwabya mughombe w’Omwami Artasasta. Abya ikere omwa muyi we Persia e Susa. Mughalha wabu Nehemia mwalhua e Yuda n’omwatsi mubi ono: ‘Abandu abasuba e Yerusalemu sibali omwa butheya. Esyombimbo n’esyonyukyo esya Banya Babeli basambangulha sisiri syathasyahimbwa.’ Nehemia mwahithana. Mwanza erighenda e Yerusalemu eriyawathikya, neryo mwasaba omwami athi amulighire aghende.

Kiro kighuma, omwami mwaminya ngoku Nehemia syatsemire. Mwabugha nayu athi: ‘Sindi nathakulhangira iwune wuthya. Hali kitsibuki?’ Nehemia mwabugha athi: ‘Busana naki ingathabya omwa bulighe omughulhu omuyi wethu, e Yerusalemu ni bisambukalirya?’ Omwami mwamubulya athi: ‘Wukanza ngakukolereki?’ Aho n’aho, Nehemia mwasaba Yehova bukuthu-kuthu. Mwabugha athi: ‘Kisi, nyithume e Yerusalemu eriyahimba esyombimbo syayu.’ Omwami Artasasta mwabwira Nehemia athi aghende, kandi omwami mwalhangira athi Nehemia akabya inianatheghibirwe omwa lhughendo lhwiwe olho. Kandi mwayira Nehemia mwa mukulhu w’abathabali e Yuda kandi mwamuha emithi y’erihimbamu esyonyuyi sy’omuyi.

Nehemia abere akahika e Yerusalemu mwarambura esyombimbo sy’omuyi. Neryo mwahindania abahereri n’bathabali n’eribabwira athi: ‘Omuyi asosire nabi kutsibu. Thutsuke obuhimbe.’ Abandu mubaligha, neryo mubatsukiraho erihimba esyombimbo.

Aliwe esindi nzighu sya Abaisraeli musyatsuka eribasekererya, n’eribugha sithi: ‘Eboha yangana therya olhuhimbo olho mukahimba.’ Abahimbi mubagheghena esyonzighu esyo, bamalholha embere erihimba. Olhuhimbo mulhwabya lhuuli kandi lhwamaghuma.

Esyonzighu musyasira okwa syombande muthina-muthina n’erianza eribambira e Yerusalemu. Abayuda babere bowa ekyo, mubakwa buba. Aliwe Nehemia mwabugha athi: ‘Simubahe. Yehova ane haghuma nethu.’ Mwahiraho abatheya eritheya abahimbi, neryo esyonzighu musyalemwa.

 Omwa biro 52 bisa, esyombimbo n’esyonyukyo mubyabya ibyamabirihwa erihimbwa. Nehemia mwaletha Abalawi abosi e Yerusalemu bakayisyandira erihwa ly’obuhimbe. Mwabathonda mwa gurupu ibiri sy’abimbi. Mubasambira eyighulhu okwa syombimbo erihika okwa Lhukyo lhw’Ekithehero neryo bamathimba okwa lhuhimbo lhw’omuyi, abandi eyi n’abandi eyi. Mubawatha esyongubi, esyonzogha, n’esyonanga n’eriimbira Yehova. Ezera mwaghenda n’egurupu nguma, na Nehemia amaghenda n’eyindi, erihika aho basanga-sanganira okwa hekalu. Abandu bosi​—abalhume, abakali, n’abaana​—mubaha obuhere oku Yehova n’eritsemera ekiro ekyo. Emirenge yabu y’obutseme iyikowibawa haali.