Lɛ wi go bak sɔm ia dɛn bifo dis tɛm. Wan Izrɛlayt man bin de we nem Nɛimaya. Na di Pashian siti na Shushan i bin de, ɛn in na bin Kiŋ Atazaksis in savant. Nɛimaya in brɔda kɔmɔt na Juda ɛn kam tɛl am bad nyuz se: ‘Di pipul dɛn we tɔn bak na Jerusɛlɛm nɔ sef. Dɛn nɔ ɛva mek di siti in wɔl dɛn ɛn in get dɛn we di Babilonian dɛn bin pwɛl pwɛl.’ Dis mek Nɛimaya in at pwɛl. I bin want fɔ go na Jerusɛlɛm fɔ go ɛp dɛn, so i pre fɔ mek di kiŋ alaw am fɔ go.

Leta, di kiŋ kam fɔ no se Nɛimaya in at pwɛl. I tɛl Nɛimaya se: ‘A nɔ ɛva si yu lɛk dis. Wetin apin?’ Nɛimaya tɛl am se: ‘Wetin mek mi at nɔ go pwɛl we mi siti we na Jerusɛlɛm dɔn pwɛl pwɛl?’ Di kiŋ aks am se: ‘Wetin yu want mi fɔ du fɔ yu?’ Wantɛm wantɛm, Nɛimaya pre na in at. Dɔn i tɛl di kiŋ se: ‘Duya, mek lɛ a go na Jerusɛlɛm fɔ go bil di wɔl dɛn bak.’ Kiŋ Atazaksis tɛl Nɛimaya se i kin go, ɛn di kiŋ mek shɔ se i sef we i bin de travul. Dɔn bak, i mek Nɛimaya bi di gɔvnɔ, ɛn i gi am bod dɛn fɔ go mek di siti in get dɛn.

We Nɛimaya rich na Jerusɛlɛm, i chɛk di wɔl dɛn na di siti. Dɔn i gɛda di prist ɛn di rula dɛn, ɛn i tɛl dɛn se: ‘Dis rili bad. Wi nid fɔ wok.’ Di pipul dɛn gri, ɛn dɛn bigin fɔ bil di wɔl dɛn bak.

Bɔt sɔm pan di Izrɛlayt dɛn ɛnimi dɛn bin de provok dɛn ɛn tɛl dɛn se: ‘Wangren fɔks ebul fɔ ib di wɔl dɛn we una de bil.’ Di wokman dɛn nɔ lisin to dɛn, ɛn dɛn kɔntinyu fɔ bil. Di wɔl bin jɔs de ay ɛn strɔng.

Di ɛnimi dɛn disayd fɔ kɔmɔt difrɛn say dɛn ɛn kam atak Jerusɛlɛm. We di Ju dɛn yɛri bɔt dis plan, dɛn fred. Bɔt Nɛimaya tɛl dɛn se: ‘Una nɔ fred. Jiova de wit wi.’ I put gaydman dɛn fɔ protɛkt di wokman dɛn, ɛn dɛn ɛnimi dɛn nɔ ebul fɔ atak dɛn.

 Insay 52 dez, dɛn dɔn fɔ bil di wɔl ɛn di get dɛn. Nɛimaya kam wit ɔl di Livayt dɛn na Jerusɛlɛm so dat dɛn go gi di ples to Jiova. I mek di Livayt dɛn sheb to tu grup fɔ siŋ. Dɛn waka na di stɛp dɛn we go ɔp di wɔl we de bay di Fawntin Gɛt, ɛn wan grup mach go wansay ɛn di ɔda grup mach go na di ɔdasay fɔ rawnd di siti. Dɛn blo trɔmpɛt dɛn, ple simbal ɛn ap dɛn, ɛn siŋ to Jiova. Ɛzra go wit wan grup, ɛn Nɛimaya go wit di ɔda grup te dɛn mitɔp na di tɛmpul. Ɔl di man dɛn, di uman dɛn, ɛn pikin dɛn mek sakrifays dɛn to Jiova ɛn dɛn bin gladi. As dɛn de gladi, pipul dɛn bin de yɛri dɛn vɔys dɛn fa fa say.