Yambula twavutuka mu mana mabwa mu mvu miavioka. Nekemiya wa selo kia Ntinu Antakesate mwisi Isaele kakala, wazingilanga muna mbanza Susani kuna Parasi. Mpangi a Nekemiya watuka kuna Yuda wayiza ye nsangu zambi. Wamvovesa vo: ‘O nkangu una wavutuka muna Yerusaleme ke bena mu luvuvamu ko. E yaka ya mbanza ye mielo mina esi Babele bafwasa ke miatungululwa ko.’ Nekemiya wakendalala kikilu. Wabaka e nzengo za kwenda kuna Yerusaleme mu vana lusadisu. Muna kuma kiaki, wasamba kwa Nzambi kimana o ntinu kamvana o nswa.

I bosi, o ntinu wabakula vo Nekemiya wakendalala kakala. Wavova vo: ‘Kisidi kumona ye nkenda za mpila yayi ko. Nkia diambu dina kutokanesa?’ Nekemiya wavova vo: ‘Aweyi ndembi kendalela wau vo e mbanz’a Yerusaleme ke yatungulwilu ko?’ O ntinu wanyuvula vo: ‘Adieyi ozolele vo yavanga?’ Vana vau, Nekemiya wasamba muna nsi a ntima. I bosi, wavova vo: ‘Dodokolo, yambula vo ngienda kuna Yerusaleme mu tungulula e yaka.’ O Ntinu Antakesate wavovesa Nekemiya vo kenda. Wamvana ina kadi vua o mfunu kimana nkangalu wakala wambote. Watumbika mpe Nekemiya se mfumu muna Yuda yo kumvana mabaya mu vangila mielo mia mbanza.

Vava Nekemiya kalwaka muna Yerusaleme, wayenda tala e yaka ya mbanza. I bosi, wakutakesa anganga ye akuluntu yo kubavovesa vo: ‘Mu vonza twina. Tufwete kuyivana muna salu.’ O nkangu watambulwila, bayantika tungulula e yaka.

Kansi, e mbeni za Aneyisaele babasevanga yo vova vo: ‘E mbulu ilenda buisa e yaka kiaki nutunganga.’ Asadi ke balanda malevo mama ko, bakwamanana tunga. E yaka yazanguka yo kumama.

E mbeni zau bayizila mu nzila yankaka mu nuanisa Yerusaleme mu kinsalukisa. Vava Ayuda bawá e diambu diadi, bamona wonga. Kansi, Nekemiya wabavovesa vo: ‘Ke numoni wonga ko. Yave una yeto.’ Wasia ayingidi kimana batanina ana  batunganga. Muna kuma kiaki, e mbeni ke balenda kubanuanisa ko.

Mu lumbu 52 kaka, e yaka ye mielo miafokolwa tungwa. Nekemiya watwasa Anelevi awonso muna Yerusaleme mu sunzula yaka ye mielo mia Yerusaleme. Wabavambula mu buka yole ya ayimbidi. Bamanta yo kulumuka e yaka muna sikada yakala vana ndambu a Vitu dia Nto za maza, yo zunga e yaka ya mbanza. E buka kimosi kiayendela ku sambu edi, kiankaka ku sambu diankaka. Basika e mpungi, kokolo ye tungungu yo yimbidila Yave. Ezera wakala mu buka kimosi, o Nekemiya mu buka kiankaka yavana balwaka kuna tempelo. Nkangu wawonso, akala, akento yo wana bavana lukau kwa Yave yo vanga nkinzi. E zú dia ndinga zau diawakana yamuna zunga yankaka.