Itech itonaluan Esdras, nemik Nehemías, se itekitikauj tekiuaj Artajerjes. Yejua nemia itech xolal Susa tein pouia Persia. Se tonal, iikniuj Nehemías ualeuak Judá kiluito tein amo kuali tein ompa panotoya: “Israelitas akin mokepkej Jerusalén amo teyi kinmatampauia. Amo kiyekchijchiuanij tepamit tein kiyoualouaya xolal uan puertas tein babilonios kiixpolojkej”. Nehemías tel tayokoyak. Kinekia tapaleuis, yejua ika kitataujtij Dios maj kipaleuiani maj tekiuaj kikauani maj youi Jerusalén.

Satepan, tekiuaj kiitak ke Nehemías tayokoxtoya. Kiluij: “Amo keman ijkon nimitsitstoya. ¿Toni mitstekipachoua?”. Nehemías kiluij: “Noxolal, Jerusalén, uejueliujtok, yejua ika nitayokoya”. Tekiuaj kitajtanij: “¿Keniuj uelis nimitspaleuis?”. Ijkuak, Nehemías ichtaka kitataujtij Jiova. Ompa, kijtoj: “Ika kualtakayot, xinechkaua maj niyouj Jerusalén maj nikyekchijchiuati tepamit”. Tekiuaj Artajerjes kikauak maj youi. No kimakak tein kipaleuiskia maj amo teyi kipano itech ojti, tein tel uejka katka. Uan no, kiixtalij kemej taixyekankej ompa Judá uan kimakak kouit tein ika kichijchiuaskiaj puertas itech xolal.

Keman Nehemías ajsik Jerusalén, kiitato keniuj moajsia tepamit. Ompa, kinsentilij tiopixkamej uan taixyekananij, uan kiniluij: “Nejin tel amo kuali yetok. Moneki tipeuaskej titekitiskej”. Israelitas kijtojkej ke kuali yetoya uan peuak kiyekchijchiuaj tepamit.

Sekin akin kinixnamikiaj israelitas kinkejkelouayaj uan kiniluiayaj: “Hasta se kuekti uelis kiuetsiltis tepamit tein nankichijchiujtokej”. Sayoj ke israelitas amo kinkakkej uan kisentokakej tekitikej. Yolik kipankixtijkej tepamit.

Miakej taixnamikinij akin kayomej itech tataman xolalmej kiixtalijkej kinteuitiuij akin nemiaj Jerusalén keman amo kimattoskiaj. Keman judíos kimatkej, semi moujkej. Sayoj ke Nehemías kiniluij: “Amo ximouikan. Jiova yetok touan”. Uan kintalij tajpianij maj kinmatampauianij tekitinij. Ijkon, taixnamikinij amo uelik kinteuijkej.

 Tepamit uan puertas kitamichijchiujkej itech sayoj 52 tonalmej. Nehemías kinualkuik levitas ompa Jerusalén kampa kichiuaskiaj iluit porin tankaya tekit. Ojkan kinixtalij maj mokuikatianij. Esdras moajsik seko, uan Nehemías okseko. Pankiskej itech escaleras itech Ikalakyan Ameyal. Satepan, sejse oloch yajkej sesekopa ikuapan tepamit uan kimalakachojkej xolal. Kitsotsontiyayaj trompetas, címbalos uan arpas, uan kiueyichiujtiyayaj Jiova ika nekuikatilmej, hasta ke mosentilijkej itech templo. Takamej, siuamej uan konemej kimakakej nemaktilmej Jiova uan kisenchiujkej iluit. Semi yolpakiaj uan hasta uejka motenkakiaj.