Pethimbo lyaEsra, opwa li omulumentu Omuisraeli, Nehemia, ngoka a li omupiya gwomukwaniilwa Artakserkses. Okwa li ha kala muSusa, oshilando shi li muPersia. Omumwayina gwaNehemia okwa zi kuJuda e na onkundana ombwinayi a ti: ‘Aantu mboka ya shuna kuJerusalem oye li muudhigu. Omadhingililokuma inaga tungululwa, nomiyelo dhoshilando inadhi longululwa, okuza sho dha hanagulwa po kAababilonia.’ Shika osha yemateke Nehemia. Okwa li a hala okuya kuJerusalem a ka kwathele. Onkee ano, okwa galikana Jehova, opo omukwaniilwa e mu ethe a ye.

Esiku limwe omukwaniilwa okwa mono kutya Nehemia okwa nika oluhodhi. Okwa ti: ‘Inandi mona nale to monika ngawo. Omolwashike wa nika oluhodhi?’ Nehemia okwa ti: ‘Otandi kala ngiini inaandi nika oluhodhi, ngele oshilando shetu, Jerusalem, osha kumunwa po?’ Omukwaniilwa okwe mu pula a ti: ‘Owa hala ndi ku ningile shike?’ Nziyanziya, Nehemia okwa galikana momutima gwe. Opo nduno okwa ti: ‘Pitika ndje ndi ye kuJerusalem ndi ka tungulule omadhingililokuma gasho.’ Omukwaniilwa Artakserkses okwe mu pitike a ye nokwa shilipaleke kutya okwa gamenwa molweendo lwe olule. Okwa langeke po wo Nehemia a ninge omunashikandjo gwaJuda nokwe mu pe iiti yokupangela omiyelo dhoshilando.

Sho Nehemia a thiki muJerusalem, okwe ende ta talatala omadhingililokuma goshilando. Opo nduno okwa gongaleke aayambi naawiliki e te ya lombwele ta ti: ‘Otu li muudhigu. Otwa pumbwa okutameka okulonga.’ Aantu oya tsu kumwe naye noya tameke okutungulula omadhingililokuma.

Ihe yamwe yomaatondi yAaisraeli oye ya sheke noya ti: ‘Ombandje otayi vulu okukumuna po edhingililokuma ndyoka tamu tungu.’ Aatungululi inaya gandja eitulomo kwaashoka tayu ulwa. Oya tsikile okutungulula edhingililokuma. Edhingililokuma olya ningi ele nolya li lya kola.

Aatondi ya za koombinga dhi ili nodhi ili oya tokola ya ponokele Jerusalem, manga aantu yamo inaaye shi tegelela. Sho Aajuda yu uvu ompangela ndjoka, oya tila. Ihe Nehemia okwa ti: ‘Inamu tila. Jehova oku li putse.’ Okwa tula po aalangeli ya gamene aaniilonga, naatondi inaya vula oku ya ponokela.

 Muule womasiku 52 omadhingililokuma oga pu okutungwa nomiyelo odha pu okulongwa. Nehemia okwe eta Aalevi ayehe kuJerusalem, omolweyapulo lyoshilando. Okwe ya tula moongundu mbali dhaaimbi. Oya londo pombanda pootalapa yu uka pOsheelo shopoluthithiya. Oye ende taya katukile oshita yu uka koombinga dha yoolokathana taya dhingoloka oshilando. Oya li taa hiki iiyaha, uuharpa nuushandja notayi imbile Jehova. Esra okwa li ta wilike ongundu yimwe, na Nehemia okwa li ta wilike yilwe, sigo ya tsakanene potempeli. Aantu ayehe, aasamane, aakulukadhi naanona, oya gandja omayambo kuJehova noya dhana oshituthi. Omawi gawo genyanyu ogu uvika nokokule.