Ka tugarukyeho emyaka mikye enyima. Nehemia, omuheereza w’Omugabe Arutagizakiseesi, akaba ari Omwisraeli owaabaire naatuura omu rurembo Shushani orwa Buperesi. Murumuna wa Nehemia akaruga Yuda n’amakuru mabi arikugira ati: ‘Abantu abaagarukire Yerusaalemu tibaine burinzi. Engo z’orurembo n’endembo ezi Abababulooni baasheenywire tizikagarukaga kwombekwa.’ Nehemia akagira ekiniga. Akaba naayenda kuza Yerusaalemu kuhwera, n’ahabw’ekyo akashaba Yehova ngu omugabe amurekye agyende.

Bwanyima, omugabe akareeba ngu Nehemia akaba atashemereirwe. Akamubuuza ati: “Ahabw’enki nooreebeka ogwirwe kubi, haza otarwaire?” Nehemia akamugarukamu ati: ‘Ekyakunzibiire kuguubwa kubi niki, obwo orurembo, Yerusaalemu, ruri ebisheenyuka?’ Omugabe akamubuuza ati: ‘Mbwenu nooyenda ngu nkukorere ki?’ Ahonaaho, Nehemia akashabira aha mutima. Bwanyima akagira ati: ‘Nyabura ’we, nyoheereza ngarukye Yerusaalemu nyombekye engo z’orurembo.’ Omugabe Arutagizakiseesi akaikiriza Nehemia kugyenda, kandi omugabe akamuha oburinzi omu rugyendo rwe rwona. Akahindura Nehemia omutegyeki wa Yuda kandi yaamuha n’ebiti by’emiryango y’orurembo.

Nehemia ku yaahikire Yerusaalemu, akashwijuma engo z’orurembo. Bwanyima akateeranira hamwe abanyamurwa n’abatware, reero yaabagira ati: “Nimureeba akabi aku turimu. Mwije twombekye orugo rwa Yerusaalemu.” Abantu bakaikiriza, kandi baatandika kwombeka orugo.

Kwonka bamwe aha bazigu ba Israeli bakabashekyerera, baabagira bati: ‘Orwo rugo rwanyu rw’amabaare, oru murikwombeka, muha ku yaakurwemereraho, rukabandama.’ Abaabaire nibombeka bakehuzya ebijumo baagumizamu nibombeka. Orugo rukaba ruraingwa kandi rwahama.

Abazigu bakacwamu kureetwa embaju zitari zimwe kutaahirira Yerusaalemu batakimanyire. Abayudaaya ku baakimanyire, bakatiina. Kwonka Nehemia akabagira ati: ‘Mutatiina. Yehova ari naitwe.’ Akataho abarinzi kurinda abombeki, kandi abazigu tibarabaasize kubatahirira.

 Omu biro 52 byonka, bakaheza kwombeka engo n’amarembo. Nehemia akareeta Abaleevi boona omuri Yerusaalemu aha mukoro gw’okuhayo orugo rwa Yerusaalemu. Akatebeekanisa guruupu ibiri z’abeeshongozi. Yaabata aha mutwe gw’orugo aha matembero g’aha Irembo ry’Enshuro kandi baayetoorora orurembo nibaruga embaju zoona. Bakateera amakondere, ebitaasa, n’enanga baahimbisa Yehova n’ebyeshongoro. Ezera akagyenda na guruupu emwe, kandi Nehemia yaagyenda n’endiijo, kuhitsya obu baateeraniire omu hekalu. Abantu boona​—abashaija, abakazi, n’abaana—​bakahayo ebitambo ahari Yehova kandi baashemererwa. Akaari k’okushemererwa kwabo kakahuririrwa hare.