Nehemiasqa Esdraspa tiemponpi kausakorqa. Payqa Persiamanta Susa llajtapi tiyakoj, rey Artajerjespajtaj trabajaj. Uj día hermanon Judamanta jamuspa nerqa: “Jerusalenman kutipoj judiosqa peligropi kashanku. Jerusalenpa perqasnin, punkusnin ima thuñisqallapuni kashanku”, nispa. Nehemiasqa chayta uyarispa mayta llakikorqa. Judiosta yanapamunanpajtaj Diosmanta mañakorqa rey payta Jerusalenman kachananpaj.

Uj día, reyqa Nehemiasta rikuspa nerqa: “Ni jaykʼaj kay jina llakisqata rikorqaykichu. ¿Imataj pasan?”, nispa. Nehemiastaj nerqa: “Jerusalén laqayasllapuni kashasqanmanta llakikuni”, nispa. Reytaj nerqa: “¿Imatá qanrayku ruwaymanri?”, nispa. Chay ratotaj Nehemiasqa sonqon ukhupi orakuspa, nerqa: “Jerusalenman rejta saqeway reyníy, perqasnin watejmanta oqharikunanpaj”, nispa. Reytaj “riy” nerqa, ñanpi ni ima pasananpajtaj sumaj jarkʼasqata kacharqa. Chantapis Judata kamachinanpaj churarqa, punkuspajpis maderata qorqa.

Nehemiasqa Jerusalenman chayaspa, llajtaj perqasninta qhawarimorqa. Sacerdotesta, kamachejkunata tantaykuspataj nerqa: “Kayqa may llakiy. Perqasta oqharina tiyan”, nispa. Judiostaj “ya” nerqanku, perqastataj oqhariyta qallarerqanku.

Judiospa wakin enemigosninkoqa burlakuspa nerqanku: “Perqa ruwasqaykichejtaqa uj atojllaraj urmaykuchinman”, nispa. Jinapis paykunaqa ruwallarqankupuni. Jerusalenpa perqasnintaj diamanta día astawan yapakorqa.

Judiospa enemigosninkoqa tukuynejmanta jamuspa maqanakuyta munarqanku. Chayta yachaspataj judiosqa mancharikorqanku. Jinapis Nehemiasqa nerqa: “Ama manchikuychejchu. Jehová noqanchejwan kashan”, nispa. Chantá guardiasta churarqa trabajajkunata enemigosninkumanta qhawanankupaj.

 Jerusalenpa perqasninta, punkusninta ima 52 diasllapi tukorqanku. Nehemiastaj levitasta Jerusalenman pusarqa, llajtaj perqasninta Diosman jaywapushajtinku takinankupaj. Chay levitastaqa iskay gruposman tʼaqarqa. Ujnin grupoqa Esdraswan rerqa, ujnintaj paywan. Juturi Punku nisqa chaynejta wicharispataj, perqa patanta rerqanku. Ujnin grupo pañanta, ujnintaj lloqʼenta. Jehová Diosman cornetaswan, platilloswan, arpaswan takispa rerqanku templokama. Chantá qharis, warmis, wawas ima Diosman jaywanasta jaywarqanku, fiestatataj ruwarqanku, maytataj kusikorqanku.