Esdras causacui punllacunallapitajmi Nehemías shuti israelita causarca. Paica Susa llajtapimi rey Artajerjesta sirvij carca. Shuj punllaca Nehemiaspaj huauquica mana alli huillaicunahuan shamushpami Nehemiasmanca, ‘Jerusalenman tigrashca israelitacunaca llaquimi causacun. Babiloniocuna llaquichishca muyundij pircacunapish pungucunapish llaquimi siricun’ nircami. Chaita uyashpami Nehemiasca llaquilla sintirirca. Paicunata ayudasha nishpami Jerusalenman rey cachachun Diosta mañarca.

Asha tiempo qꞌuipaca Nehemías llaquilla cajta ricushpami reyca, ‘¿ima nishpataj llaquilla cangui?’ nirca. Nehemiasca, ‘ñuca llajta Jerusalén llaqui cajta yachashpami llaquilla cani’ nircami. Reyca, ‘¿imatataj rurachun ningui?’ nircami. Chai ratomi Nehemiasca shungu ucullapi Diosta mañarca. Qꞌuipaca, ‘Jerusalenman rishpa pircacunata cutin shayachingapaj ñucata cachahuai’ nircami. Rey Artajerjesca rilla nircami. Pai ama ima tucunchunpish imalla minishtishcacunatami cushpa cacharca. Chashnallataj Judá llajtata mandachun churashpami chai llajta pungucunata allichichun caspicunata curca.

Nehemiasca Jerusalenman chayashpaca pircacuna ima laya cashcatami ricunaman rirca. Qꞌuipaca sacerdotecunata, mandajcunatapish tandachishpami, ‘caica yallitaj llaquimari. Allichishunchij’ nirca. Chaimantami gentecunaca pircacunata cutin shayachi callarircacuna.

Israelitacunata huaquin pꞌiñajcunaca, ‘paicuna muyundijta pircashcataca shuj zorro huichiyashpallapish urmachinallamari’ nishpami burlarijcuna carca. Chashna nijpipish israelitacunaca ashtahuan jatun sinchi pircacunatami rurashpa catircacuna.

Qꞌuipaca tucui ladocunamanta contracunami Jerusalenta ñapish llaquichisha nircacuna. Judiocunaca chaita yachashpami mancharircacuna. Pero Nehemiasca, ‘ama manchaichijchu. Jehovami ñucanchijhuan’ nircami. Trabajadorcunata cuidachunpish guardiacunatami churarca. Chashnami contracunaca mana llaquichi tucurcacuna.

Jerusalén llajta pircacunata, pungucunatapish 52 punllacunapimi shayachircacuna.  Chaimi Nehemiasca shuj fiestata rurangapaj levitacunata Jerusalenman pushamurca. Paicunataca ishqui grupotami rurarca. Shuj grupoca Esdrashuanmi carca. Caishuj grupoca Nehemiashuanmi carca. Qꞌuipaca shuj grupoca alli ladoman caishujca lluqui ladomanmi pirca jahua muyundijta rircacuna. Shinallataj trompetacunata, cimbalocunata, arpacunata tocashpami Jehová Diosta cantarcacuna. Chashnami Diospaj huasipi tandanacurcacuna. Chaipica tucuicunami achcata cushicushpa Diosman sacrificiocunata curcacuna. Paicuna cushilla cantacushcaca carumanmi uyarirca.