Israel nacionniyuq Nehemiasmi Persia nacionpi kamachiq Artajerjespa sirvienten karqa. Huk punchawmi Nehemiaspa wawqin chayaramurqa Juda nacionmanta, hinaspam willarqa: “Israel runakunam mana pirqayuq llaqtapi yachachkanku. Babilonia runakuna tuñichisqankumantapacham punkuwan muyuriqnin pirqakunapas mana allichasqa kachkan”, nispa. Hinaptinmi Nehemiasqa llumpayta llakirikuspan Jehova Diosta mañakurqa pirqaq rinanpaq.

Chaymantam Artajerjesqa Nehemiasta tapurqa imanasqa llakisqa kasqanmanta, chaymi Nehemiasñataq nirqa: “Jerusalen llaqtaypa pirqankuna tuñisqa kaptinmi llakisqa kachkani”, nispa. Chaynata willakuptinmi Artajerjesqa tapurqa: “¿Imatataq ruwayman yanapanaypaq?”, nispa. Hinaptinmi Nehemiasqa Diosta mañakuykuspan Artajerjesta nirqa: “Jerusalenpa lliw muyuriqninta musuqmanta pirqamunaypaqyá saqiykuway”, nispa. Chaynapim Artajerjesqa rinanpaq saqiykuspan tablakunatapas punkupaq quykurqa, hinaspapas Juda nacionpi autoridad kananpaqmi Nehemiastaqa churaykurqa.

Nehemiasqa Jerusalenpa pirqankuna tuñisqa kasqanta qawaykuspanmi sacerdotekunatawan autoridadkunata nirqa: “Kaqmantam pirqananchik”, nispa. Chaynapim runakunaqa “arí” nispanku pirqayta qallaykurqaku.

Ichaqa chiqniqninku runakunam paykunamanta asikuspanku nirqaku: “Atuqllaraqmi pirqasqaykichiktaqa tuñirachinqa”, nispa. Chayna asikuptinkupas pirqaqkunaqa mana kasuspam hinalla pirqarqaku.

Chayta qawaspankum chiqniqninkunaqa tuñichinankupaq rimanakururqaku, chaymi Juda runakunaqa llumpayta mancharikurqaku. Ichaqa Nehemiasmi kallpancharqa: “Ama manchakuychikchu. Jehova Diosmi ñuqanchikwanqa kachkan”, nispa. Hinaspam pirqaqkunata mana imananankupaq soldadokunata churarurqa.

 52 punchawllapim pirqayta hinaspa punku ruwaytapas tukururqaku, hinaspam Nehemiasqa Leviy runakunatapas takinankupaq qayachirqa. Paykunam qispiruspanku pirqapa hawanta Jehova Diospaq takistin muyurqaku. Wakin takiqkunam Esdraswan wak lawninta muyumurqaku, wakinñataqmi Nehemiaswan kay lawninta. Hinaspam arpakunatapas tocastin Diospa wasinman chayarurqaku, chaypim hatunpas taksapas kusikuyllawanña Jehova Diospaq animalta kañapurqaku hinaspam fiestata ruwarqaku.