Ајде те ирана амен некобор берша напалал. Kи персиско диз Суза живинела сине јекх Израелцо со викинела пе сине Неемија. Ов сине слуга е цареске Артаксеркс. Е Неемијаскоро пхрал ало тари Јуда хем вакерѓа леске јекх лошно хабери: „О народо со иранѓа пе ко Ерусалим нане безбедно. О ѕидија хем о порте е дизјакере со уништинѓе лен о Вавилонција панда нане обновиме“. О Неемија сине бут секиримо. Ов мангља те џал ко Ерусалим те поможинел, хем адалеске молинѓа пе е Јеховаске о цари те мукхел ле те џал.

Пало несаво време, о цари дикхља кај о Неемија тано тажно. Ов вакерѓа: „Никогаш на дикхљум тут аѓаар. Со уло?“ О Неемија вакерѓа: „Сар те на овав тажно, кеда ми диз, о Ерусалим, тано ко рушевине?“ А о цари пучља ле: „Сар шај те поможинав тут?“ Ко адава моменти, о Неемија молинѓа пе ки песте. Пало адава ов вакерѓа: „Молинава тут, мукх ман те џав ко Ерусалим те обновинав о ѕидија е дизјакере“. О цари, о Артаксеркс, вакерѓа е Неемијаске кај шај те џал хем денѓа ле са со ваљани леске те шај те ресел безбедно ко Ерусалим. Исто аѓаар, керѓа ле те овел управители ки Јуда хем денѓа ле доволно каш башо о порте е дизјакере.

Кеда о Неемија ресља ко Ерусалим, дикхља ки сави состојба тане о ѕидија е дизјакере. Пало адава, кхединѓа е свештеникон хем е управителен хем вакерѓа ленге: „И состојба тани бут лошно. Ваљани одма те астара амен ки бути“. О мануша согласинѓе пе леа, хем почминѓе те поправинен о ѕидија.

Ама несаве мануша со на мангена сине е Израелцон, почминѓе те асан ленге хем вакерѓе: „О ѕидо со градинена ле шај те рушинел ле јекх лисица“. Ама о работникија на шунена лен сине хем понадари да градинена сине. О ѕидија овена сине са поуче хем позорале.

О противникија одлучинѓе изненадено те нападинен о Ерусалим таро различна стране. Кеда о Евреија шунѓе башо акава, ола бут дарандиле. Ама, о Неемија вакерѓа ленге: „Ма даран. О Јехова тано аменцар“. Ов чхивѓа  стражарија те заштитинен е работникон, хем аѓаар о противникија нашти сине те нападинен.

O ѕидија хем о порте сине завршиме башо 52 диве. О Неемија викинѓа са е левитен ко Ерусалим, те славинен со завршинѓе и бути. Одвојнѓа лен ко дуј групе те гиљавен. Ола уклиле ко е дизјакоро ѕидо хем цидинѓе те опколинел и диз — јекх група тари јекх страна, а јавер група тари јавер страна. Ола башалена сине ко трубе, чинеле хем харфе хем гиљавена сине е Јеховаске. О Езра гело јекхе групаја, а о Неемија е јавераја. Ко крајо, о солдуј групе аракхле пе англо храми. Са о мануша — мурша, џувља хем чхаве — денѓе жртве е Јеховаске хем веселинѓе пе. Ола сине добором радосна со ленгоро гласо шунѓола сине сегде.