Ajde te irana amen nekobor berša napalal. Ki persisko diz Suza živinela sine jekh Izraelco so vikinela pe sine Neemija. Ov sine sluga e careske Artakserks. E Neemijaskoro phral alo tari Juda hem vakergja leske jekh lošno haberi: „O narodo so irangja pe ko Erusalim nane bezbedno. O zidija hem o porte e dizjakere so uništingje len o Vaviloncija panda nane obnovime“. O Neemija sine but sekirimo. Ov manglja te džal ko Erusalim te pomožinel, hem adaleske molingja pe e Jehovaske o cari te mukhel le te džal.

Palo nesavo vreme, o cari dikhlja kaj o Neemija tano tažno. Ov vakergja: „Nikogaš na dikhljum tut agjaar. So ulo?“ O Neemija vakergja: „Sar te na ovav tažno, keda mi diz, o Erusalim, tano ko ruševine?“ A o cari pučlja le: „Sar šaj te pomožinav tut?“ Ko adava momenti, o Neemija molingja pe ki peste. Palo adava ov vakergja: „Molinava tut, mukh man te džav ko Erusalim te obnovinav o zidija e dizjakere“. O cari, o Artakserks, vakergja e Neemijaske kaj šaj te džal hem dengja le sa so valjani leske te šaj te resel bezbedno ko Erusalim. Isto agjaar, kergja le te ovel upraviteli ki Juda hem dengja le dovolno kaš bašo o porte e dizjakere.

Keda o Neemija reslja ko Erusalim, dikhlja ki savi sostojba tane o zidija e dizjakere. Palo adava, khedingja e sveštenikon hem e upravitelen hem vakergja lenge: „I sostojba tani but lošno. Valjani odma te astara amen ki buti“. O manuša soglasingje pe lea, hem počmingje te popravinen o zidija.

Ama nesave manuša so na mangena sine e Izraelcon, počmingje te asan lenge hem vakergje: „O zido so gradinena le šaj te rušinel le jekh lisica“. Ama o rabotnikija na šunena len sine hem ponadari da gradinena sine. O zidija ovena sine sa pouče hem pozorale.

O protivnikija odlučingje iznenadeno te napadinen o Erusalim taro različna strane. Keda o Evreija šungje bašo akava, ola but darandile. Ama, o Neemija vakergja lenge: „Ma daran. O Jehova tano amencar“. Ov čhivgja  stražarija te zaštitinen e rabotnikon, hem agjaar o protivnikija našti sine te napadinen.

O zidija hem o porte sine završime bašo 52 dive. O Neemija vikingja sa e leviten ko Erusalim, te slavinen so završingje i buti. Odvojngja len ko duj grupe te giljaven. Ola uklile ko e dizjakoro zido hem cidingje te opkolinel i diz — jekh grupa tari jekh strana, a javer grupa tari javer strana. Ola bašalena sine ko trube, činele hem harfe hem giljavena sine e Jehovaske. O Ezra gelo jekhe grupaja, a o Neemija e javeraja. Ko krajo, o solduj grupe arakhle pe anglo hrami. Sa o manuša — murša, džuvlja hem čhave — dengje žrtve e Jehovaske hem veselingje pe. Ola sine doborom radosna so lengoro glaso šungjola sine segde.