Рисавасапэ каринг и бэрша, савэ найдэлмут прожылэ. Андо персидско форо Сузы, жувэлэс о израильтянино, савэс ақарэнэс Неемия. Во терэлас бути кай о царё, савэс ақарэнас Артаксерксо. Еқвар лэ Неемияско ԥрал авеля лэстэ и ԥэндя, кай андэ Иудея бари бида. Во ԥэндя: «И мануша, савэ рисайлэ андо Иерусалимо, вонэ трэбуй тэ фэринпэ. Лэ форостирэ стины и вороты, савэ розмардэ и вавилоняноря, кадя и на вазглэ». Лэ Неемиясти ашэля фартэ ԥарэс по ди. Тоди во закамля тэ жал андо Иерусалимо и тэ дэл зор лэ манушэнди. Важ када во ля тэ мангэлпэ лэ Дэвлэсти, кай о царё тэ одмэкэл лэс.

Прожыля набут время, о царё додиқля, кай лэ Неемиясти фартэ ԥарэс по ди. Во пушля: «Со стердяпэ? Мэ тут никала кацавэс на диқлэм». О Неемия ԥэндя: «Мэрно форо, о Иерусалимо, розмардо, сар же манди тэ на авэл ԥарэс по ди?» О царё пушля: «Со мэ важ тутэ тэ стерав?» О Неемия сразу же мангляпэ лэ Дэвлэсти андо гиндо и ԥэндя: «Мангав тут, мэк ман тэ жав андо Иерусалимо, кай тэ ваздав и стины». О царё Артаксерксо мэкля лэ Неемияс, кай во тэ жал. Кадяжэ о Артаксерксо бут со стердя, кай о Неемия драго тэ дожал каринг о форо Иерусалимо. Во кадяжэ стодя лэ Неемияс, кай во тэ правий андэ Иудея и дя лэсти кашта, кай тэ стерэл и вороты.

Кала о Неемия авеля андо Иерусалимо, во продиқля лэ форостирэ стины. После када во стидя лэ рашан и лэ барэ манушэн и ԥэндя: «Вся росԥаго. Трэбуй тэ ласпэ пала бути». И мануша ԥэндэ «да» и линэ тэ ваздэн и стины.

Но дэсавэ вороӷоря, савэ сас кай израильтяноря, линэ тэ асанпэ лэндар и тэ ԥэнэн: «Кати и лиса тэ хукэл пэ тумарэ стины, и вонэ сразу же пэрэна!» Кодэла, ко ваздэнас и стины, на шонас сама, кай вонэ асанаспэ и терэнас пэстири бути. Дес десэстар и стины ашэнас вся май вуче и май састэ.

Тоди и вороӷоря закамлэ тэ дэн по Иерусалимо всаворэ ригэндар. Кала иудеёря ашундэ пала када, вонэ пэрэдарайлэ. Но о Неемия ԥэндя: «На даран. О Иегова амэнца». Во стодя лэ манушэн, кай тэ фэрин кодэлэн, ко ваздэнас и стины, кай и вороӷоря тэ на дэн пэр лэндэ.

 И стины и вороты вазглэ кати пала 52 деса. Кала парашэлэ тэ терэн и бути, о Неемия стидя андо Иерусалимо всаворэн левитонэн. Во стодя лэ левитонэн пэ дуй рига, кай вонэ тэ дилабэн. Кадэла мануша вазглэпэ пэ стина и линэ тэ обжан о форо па разни рига и жанас дэкин на стидэпэ. Вонэ дилабэнас диля важ о Иегова, ай кадяжэ дилабэнас пэ кимвалоря, пэ арфы и андэ трубы. И мануша, савэ жылэ пэ ек риг, лэнца жыля о Ездра. Ай аврэ манушэнца, савэ жылэ пэ авэр риг, жыля о Неемия. И кадэла мануша стидэпэ андо храмо. Всаворэ мануша и мурша, и жувля, и бэятцэ андэ́ жервы лэ Иеговасти и стодэ празднико. Важ кода кай вонэ дилабэнас анда вся оди, лэн ашундёлас жы дурал.