Xa hanni Yerusaalamete huxxa galagalle huxxinara albaanni ikkinore laꞌno. Nehimiya Faarsi gobbara Suusa yinanni katamira Moote Arxekisisira soqqamanno Israeelaawichaati. Nehimiya rodii Yihudu gobbanni busha duduwo haaꞌre dayi. Togo yiisi: ‘Yerusaalame higino manni lowo geeshsha qarrame no. Baabiloonete manni diiginoha katamu huxxa galagalle dihuxxinoonni.’ Nehimiya lowo geeshsha dadilli. Isi Yerusaalame haꞌre kaaꞌlate hedi; konni daafira moote haꞌranno gede fajjasira Yihowa huucciꞌri.

Mitto barra, Moote Arxekisisi Nehimiya dadillinota afino. Hakkiinni moote togo yii: ‘Togo ikkite heedheenna lae horo diegennoommo. Maaho ma ikkootto?’ Nehimiya qole, ‘Yerusaalamete katami diigame heeꞌreenna hiitto dadilla hoogeemmo?’ yii. Hakkiinni moote, ‘Xa maa assammohera hasiꞌrootto?’ yee xaꞌmisi. Bayichonko Nehimiya wodanisinni huuccatto assiꞌri. Hakkiinni isi, ‘Yerusaalame haꞌre katamu huxxa galagale huxxeemmo gede fajjie ballo’ yii. Moote Arxekisisi haꞌri yiisi, hattono gobbasi keerunni iillanno gede agartannosire worino. Qoleno isi Nehimiya Yihudu gashshaancho assino, hattono katamu xullicho seekkitanno haqqe uyinosi.

Nehimiya Yerusaalame iilliti, katamu huxxa gaangaawe lai. Hakkiinni isi kakkalaanonna gashshaano gamba asse togo yiinsa: ‘Qarru giddo heeꞌnoommo. Katamu huxxa huxxa hasiissannonke.’ Mannuno maahoyye yee katamu huxxa galagale huxxa hanafi.

Kayinni mite Israeelete baarigaarra togo yitanni haariintunsa: ‘Kiꞌne huxxitinanni huxxi yeedaala nafa giddituro diigamannoho.’ Ikkollana insa mannu mishinsarono huxxa huxxa diagurtino. Insa seedanna kaajjado huxxa huxxitu.

Baarigaarransa addi addi raginni dagge, Yihudu manni hedikki Yerusaalame gawajjitara mixidhu. Yihudu manni tenne macciishshe lowo geeshsha waajji. Nehimiya kayinni, ‘Yihowa ledonke noona waajjitinoonte’ yiinsa. Isi baarigaarransa dagge loosaasine gawajjitannokki gede agaranno manna wori.

 Yerusaalamete huxxanna huxxu cufana 52 barri giddo seekkine gundoonni. Nehimiya huxxa maassiisate Leewaawoota baala Yerusaalame woshshino. Isi insa lame gaamo ikkite faarsitanno gede assino. Insa Wayi Waalcho yinanni bayichi widoonni noo dirimi aanaanni higge huxxu aanira gidditu; hakkiinni lamenti gaamo kawanna kaꞌaa higge katama doyitu. Insa xurumbunni, tsilaantsiletenninna gingilaatunni Yihowara faarsitino. Izira mitte gaamo ledo haꞌrino, Nehimiya qole layinki gaamo ledo haꞌrino; hakkiinni lamenti gaamo qullaawu miniwa xaaddino. Labballu, meentunna qaaqquulluno gatikki baalunku manni, Yihowara kakkalo shiqishino, hattono hagiirrunni qeexaaꞌlino. Insa huuro xeertote noo manni nafa macciishshino.