Su zaman i Ezra, piạ tau Israel arenge Nehemia mětẹ̌tanạ su soa Syusyan su Persia. I sie kai ělangu Datu Artahsasta. Anạu sěngkataung i Nehemia diměnta bọu Yehuda kụ naul᷊ị habarẹ̌ dal᷊akị ini: ’Taumata su Yerusalem tawe aman. Těndạ dingangu gěrbangu soa seng nirusang tau Babelẹ̌ bědang tawe saụ nikoạ.’ Nehemia sěbạe nasusah naung. I sie mapulu sarang Yerusalem gunang mẹ̌tul᷊ung si sire, hakị u ene i sie nẹ̌doa tadeạu makaěbạ izin bọu Datu.

Piạ su sahěllo, Datu nakasilo i Nehemia měngkate nasusah naung. I sie naul᷊ị, ’Iạ bědang tawe nakasilo i kau kere ini, kawe piạ apa?’ Nehemia simimbahẹ̌, ’Iạ nasusah naung ual᷊ingu Yerusalem, soaku, bědang tawe saụ nikoạ.’ Datu nẹ̌kiwal᷊o, ’Apa botonge koatengku gunang mẹ̌tul᷊ung si kau?’ Nehemia apidu nẹ̌doa su ral᷊ungu naunge, bọu ene i sie nẹ̌bera, ’Tul᷊ungko gělị izin si siạ sarang Yerusalem gunang saụ měkoạ těndạe.’ Datu Artahsasta něgělị izin si sie kụ něngatorẹ̌ tadeạu i sie masal᷊amatẹ̌ mahumpạ su Yerusalem. Datu lai něhengkẹ si Nehemia nakoạ gubernur Yehuda kụ něgělị kalu gunang měkoạ gěrbangu soa.

Su tempong nahumpạ su Yerusalem, Nehemia němarikěsa těndạ u soa. Bọu ene, i sie něngoro manga imang dingangu těmbonang pẹ̌komol᷊ẹ̌. I sie nẹ̌bera, ’Těndạ sěbạe narusa-rusa. I kitẹ harusẹ̌ saụ měkoạ.’ I sire setuju. Bọu ene, i sire něnětạ někoạ těndạ ene.

Katewe manga sědụ i sire něheghesẹ̌ kụ nẹ̌bera, ’Mạeng piạ rubah maawị, těndạ ene sarung mahaka.’ Tau Israel tawe nẹ̌pandung kụ turusẹ̌ něhal᷊ẹ̌. Těndạ ene kakạdangẹe dingangu kakạtoghase.

Manga sědụ mapulu měngalo Yerusalem bọu haghing tampạ. Su tempong tau Israel nakasingkạ rencana ene, i sire natakụ. Katewe, i Nehemia nẹ̌bera, ’Abe katakụ. Yehuwa ene dingangi kitẹ.’ Nehemia něngoro taumata gunang pěndiagạ manga mělahal᷊ẹ̌ tadeạu sědụ tawe makapěnilakạ si sire.

 Su ral᷊ungu 52 ěllo, těndạ dingangu gěrbangu soa nasueng koạe. I Nehemia němaringang kěbị tau Lewi sarang Yerusalem gunang měkoạ acara penahbisan. I sie němahiạ si sire nakoạ darua komol᷊ang mẹ̌kakantarị. Bọu ene, i sire naawị sarang těndạ kụ dimal᷊eng nẹ̌tal᷊ei, komol᷊ang sěmbaụ sarang koaneng kụ sěmbaụ lai sarang kaihi, nělikụ soa. I sire něnal᷊ang terompet, simbal, harpa, dingangu nẹ̌kantarị nẹ̌dalo si Yehuwa. Komol᷊ang sěmbaụ dimal᷊eng dingangi Ezra, kụ sěmbaụ lai dingangi Nehemia. Bọu ene, i sire nẹ̌sěmạ su bait. Kěbị taumata, měnětạ bọu esẹ, wawine, dingangu manga rariọ, něgělị sasěmbah si Yehuwa kụ i sire sěbạe mal᷊uasẹ̌. Tingihi sire nikaringihẹ̌ sarang marau.