I ng’ei oro ma kadhu 400 niai ma jugiero gang’kidi mi Yerusalem kendo, jalam moko ma nyinge Zekaria ku dhaku pare Elisabeti gibed gikwo ceng’ini kud adhura maeno. Nwang’u gigamiri oro ukadhu lee, ento ginyolo ngo awiya. Nindo moko kinde ma Zekaria ubino wang’u udok ma ng’wice ng’ar i kamaleng’ mir hekalu, malaika Gabriel ugam uwok ire. Lworo umaku Zekaria, ento Gabriel uyero ire kumae: ‘Lworo kud unegi. Akelo iri lembanyong’a m’uai i bang’ Yehova. Dhaku peri Elisabeti binyolo nyathin man ibicaku nyinge Yohana. Yehova ular ung’io Yohana pi tic ma segi.’ Zekaria upenje kumae: ‘Acopo yio lembe m’ibeyero nenedi? An ku dhaku para wadaru tii, wacopo nyolo ngo nyathin.’ Gabriel uyero ire kumae: ‘Mungu ora en akel iri lembanyong’a maeni. Ento pilembe iyio ngo lembe m’ayero iri, ibiweco ngo nitundo i ng’ei ma nyathin ne binyolere.’

Zekaria ugalu i kamaleng’ pi saa ma lee nisagu ma naka. E saa m’egam ewok, dhanu m’ubino kure gimito ging’ei nia ang’o dhe m’utimere. Ento Zekaria copo weco ngo. Ecopo weco ndhu ku cinge kende. E dhanu ugam unyang’ nia Zekaria unwang’u kwenda moko m’uai i bang’ Mungu.

I ng’ei nindo moko, Elisabeti unwang’u mugisa man enyolo nyathin ma nico tap calu ma malaika ular uyero. Jurimbe man wedi pare gibin gineno mukere. Gibino kud anyong’a lee dit i kum Elisabeti. E Elisabeti uyero kumae: ‘Nyinge bibedo Yohana.’ Gidwoko ire kumae: ‘Ng’atu ma nyinge Yohana umbe i kind wat peri. Cak nying’ Zekaria ma won i kume.’ Ento Zekaria ugoro kumae: ‘Nyinge tie Yohana.’ E ndhundhu nica, Zekaria ucaku weco kendo! Lembe pa nyathin ne uyik i Yahudi zoo man dhanu gipenjiri ku zungo kumae: ‘Nyathin maeni bidongo ni dhanu ma nenedi?’

I ng’eye, tipo maleng’ ugam uromo Zekaria. E ewo kumae: ‘Pak ubed ni Yehova. Eng’olo ni Abraham nia  ebioro jalar, Masiya pi nilaruwa. Yohana bibedo jabila man ebiyiko yo ni Masiya.’

Lembe moko mange ma segi utimere ni Maria ma tie bende wat pa Elisabeti. Wakenen lembene i wic m’ulubo.