Jerusalenan perqanakapajj wasitampi luraskäna uka tiempotjja 400 maranakaw pasjjäna. Zacarías sacerdotempi Elisabet esposapampejj uka marka jakʼanwa jakapjjäna. Jupanakajj walja maranakaw casaratäjjapjjäna, ukampis janiw wawanïpkänti. Mä urojja Zacariasajj temploruw incienso loqtiri mantäna, ukanwa Gabriel sat angelajj uñstäna. Zacariasajj wal sustjasïna. Angelajj akham sänwa: ‘Jan ajjsaramti. Nayajj Jehová Diosan suma yatiyäwinakapwa apanta. Elisabet esposamajj wawanïniwa, uka wawasti Juan satarakïniwa. Jehová Diosajj mä suma luräwi phoqañapatakiw jupar ajllisi’ sasa. Zacariasajj akham sasaw jisktʼäna: ‘¿Kuntï siskta ukajj cheqati janich uk kunjamatsa yatiristjja? Nayas esposajas jilïrëjjapjjtwa, janiw wawanëjjapjjeristti’ sasa. Gabriel sat angelajj sarakïnwa: ‘Diosaw nayarojj aka suma yatiyäwi apayanitu. Ukampis jan creyitam laykojja wawan nasiñapkamajj janiw parlañ puedjjätati’ sasa.

Zacariasajj jayaw templo manqhankjjäna. Suyasipkäna uka jaqenakajj kunarak paspacha sasaw sapjjäna. Mistunjjäna ukhajja, janiw parlirjamäjjänti, amparampikiw parljjäna. Uk uñjasasti ‘Diosaw mä yatiyäwi jupar churpacha’ sasaw jaqenakajj sapjjäna.

Mä qhawqha tiempotjja, Elisabetajj usurëjjänwa. Kunjamtï angelajj siskäna ukarjamaw mä wawa ususïna. Elisabetan familiaranakapasa amigonakapasa wawar uñjir jutasajj wal kusisipjjäna. Elisabetajj ‘Juan satäniwa’ sasaw säna. Jupanakajj sapjjarakïnwa: ‘Janiw khitis familiaranakamat ukham sutinejj utjkiti. Antisas tatapjam Zacarías satäpan’ sasa. Ukampis Zacariasajj akham sasaw qellqäna: ‘Jupajj Juan satawa’ sasa. Ukaratpachaw Zacariasajj parlañ qalltjjäna. Judea oraqenjja niya taqeniw uka wawatjja yatipjjäna, akham sasaw jisktʼasipjjarakïna: ‘Jachʼäjjani ukhajj ¿khitipunirakïni aka wawasti?’ sasa.

Zacariasajj espíritu santompi phoqtʼatäsajj akham sasaw mä profecía arsüna: ‘¡Jehová Diosar jachʼañchapjjañäni!  Jaqenakar salvañatakejj Mesiasaruw khitanëjja sasaw Diosajj Abrahanar säna. Uka Mesiasan thakipwa Juanajj mä profetjama wakichani’ sasa.

Elisabetan María sat mä familiaraparojj niya ukham musparkañarakiw pasäna. Uksti akjjaruw yatjjatañäni.