Nunga lobi 400 taon tembok ni Jerusalem dipadenggan. Adong sahalak malim na tinggal di jonok ni huta i na margoar si Sakaria. Istrina si Elisabet. Nunga leleng nasida kawin, alai ndang adong gellengna. Sada tingki, manutung dupa ma si Sakaria di bagas joro. Tompu ma ro sada suru-suruan manang malaikat na margoar si Gabariel. Mabiar ma si Sakaria, alai didok si Gabariel ma, ‘Unang mabiar ho. Na paboahon barita na uli do ahu sian Jahowa. Laho manubuhon anak nama istrim. Bahen ma goarna si Johannes. Dipillit Jahowa do ibana laho mangulahon ulaon na ringkot.’ Didok si Sakaria ma, ‘Ndang mungkin! Nunga matua ahu dohot istriku, ndang boi be hami margelleng.’ Didok si Gabariel ma, ‘Debata do na manuru ahu paboahon i. Alai ndang porsea ho. Alani i, gabe bisu ma ho sahat tu na tubu anakmi.’

Leleng do si Sakaria di bagas joro i. Dung kaluar ibana, disungkun angka halak ma aha na masa. Alai ndang boi be si Sakaria mangkatai. Holan tanganna ma dibahen laho paboahon i tu nasida. Gabe diboto nasida ma naung ro suru-suruan ni Debata tu si Sakaria.

Ujungna, hamil ma si Elisabet. Dung i tubu ma anakna songon na didok suru-suruan i. Marroan ma angka dongan dohot keluarga ni nasida. Las hian do roha ni nasida. Didok si Elisabet ma, ‘Si Johannes do bahenon goarna.’ Alai didok nasida ma, ‘Ndang adong keluargam na margoar si Johannes. Si Sakaria ma bahen goarna. Songon goar ni bapakna.’ Alai disurat si Sakaria ma, ‘Si Johannes do goarna.’ Tingki i, boi ma si Sakaria mangkatai muse! Sude do halak na di Judea mamboto cerita i. Gabe sungkun-sungkun ma roha ni nasida, ‘Songon dia ma molo dung balga haduan anakna i ate?’

Dung i mandapot tondi parbadia ma si Sakaria. Gabe didok ma, ‘Puji ma Jahowa. Nunga marjanji ibana  tu si Abraham laho mangalehon sipalua, i ma Messias na laho paluahon hita. Gabe panurirang ma si Johannes na laho paradehon dalan tu Messias i.’

Adong ma muse na masa tu keluarga ni si Elisabet, i ma si Maria. Taida ma i di cerita na mangihut.