Be wieli Zerizalɛmun klɔ’n i wun talɛ’n i kplan w’a di afuɛ ya nnan (400) tra su. Ɲanmiɛn nuan ijɔfuɛ kun mɔ be flɛ i Zakari’n, ɔ nin i yi Elizabɛti be tran Zerizalɛmun klɔ’n i wun koko lɛ. Be jali w’a di afuɛ kpanngban, sanngɛ be leman ba. Cɛn kun mɔ Zakari ɔli ansan yralɛ Ɲanmiɛn i sua’n nun lɔ’n, anzi Gabliɛli fiteli i ɲrun. Srɛ kunnin Zakari. Sanngɛ Gabliɛli seli i kɛ: ‘Nán srɛ kun wɔ. Ń má kán ndɛ fɛ kun ń klé wɔ. Ndɛ sɔ’n fin Zoova. Yɛle kɛ ɔ yi Elizabɛti wá wú ba yasua kun. Bé wá flɛ́ i Zan. Zoova fɛli i kɛ ɔ di junman cinnjin kpa kun.’ Zakari usɛli i kɛ: ‘?Ngue yɛ ɔ kle kɛ ɔ́ yó sɔ sakpa-ɔ? Afin min nin min yi y’a yo kpɛnngbɛn. E kwlá wuman ba kun.’ Gabliɛli seli i kɛ: ‘Ɲanmiɛn yɛ ɔ sunmannin min kɛ n kan ndɛ nga n kle wɔ-ɔ. Sanngɛ kɛ mɔ w’a lafiman su’n ti’n, a su kwlá ijɔman kun lele ɔ yi fá wú ba’n.’

Cɛn sɔ’n nun’n, Zakari cɛli Ɲanmiɛn sua’n nun lɔ. Ɔ maan kɛ ɔ fiteli’n, be nga be su minndɛ i gua su lɔ’n be kunndɛli kɛ bé sí sa ng’ɔ juli lɔ’n. Sanngɛ Zakari kwlá ijɔman. I sa yɛ ɔ fa kan ndɛ kle be-ɔ. Ɔ maan sran mun be wunnin i wlɛ kɛ Ɲanmiɛn kannin ndɛ kleli i.

I sin’n, Elizabɛti wunnzɛli. Ɔ wuli ba yasua kun kɛ nga anzi’n fa kannin’n sa. I janvuɛ mun nin i osufuɛ mun be bali ba’n i nianlɛ. Be klun jɔli dan. Elizabɛti seli kɛ: ‘Maan be flɛ i Zan.’ Sran mun be tɛli i su kɛ: ‘Be flɛman ɔ osufuɛ mun be nun wie fi sɔ. Maan be flɛ i Zakari kɛ i si sa.’ Sanngɛ Zakari klɛli ndɛ kun tɛbua kun su. Ɔ klɛli i kɛ: ‘I dunman’n yɛle Zan.’ Kɛ ɔ yoli sɔ cɛ’n, Zakari kwla ijɔli. Ndɛ sɔ’n truli Zida mɛn’n i bue kwlaa su. Sran mun be usali be wun kɛ: ‘?Ngue yɛ cɛn wie lele’n ba nga ɔ́ wá yó-ɔ?’

Ɲanmiɛn wawɛ’n jrali Zakari su. Ɔ seli kɛ: ‘Maan manmanlɛ’n yo Zoova liɛ.  Ɔ seli Abraamun kɛ ɔ́ wá súnman Mesi’n kɛ ɔ de e. Zan wá yó Ɲanmiɛn nuan ijɔfuɛ yɛ ɔ́ wá bó Mesi’n i ɲrun atin.’

Sa ng’ɔ juli Elizabɛti su’n i wunsu juli i osufuɛ Mali i su wie. É wá kɛ́n i ndɛ like suanlɛ ng’ɔ́ bɛ́ i sin’n nun.