Ilyo papitile imyaka ukucila pali 400 ukutula apo bakuulile cipya cipya ifibumba fya musumba wa Yerusalemu, Sekaria shimapepo no mukashi wakwe Elisabete baleikala mupepi no musumba. Kale sana baupene lelo tabakwete umwana nangu umo. Bushiku bumo ilyo Sekaria ali mwi tempele aletuula ifyanunkila, malaika Gabriele alishile kuli ena. Sekaria alyumfwile umwenso, lelo malaika amwebele ati: ‘Witiina. Nakuletela ilyashi ilisuma ukufuma kuli Yehova. Umukashi obe Elisabete akakwata umwana umwaume kabili ukamwinike ati Yohane. Yehova nasala Yohane ukuti akabombe umulimo uwaibela.’ Lyena Sekaria aipwishe malaika ati: ‘Nalaishiba shani ukuti ifyo mwalanda fikacitika? Pantu ine no mwina mwandi natukota, te kuti tukwate umwana.’ Gabriele amwebele ati: ‘Lesa e untumine ukwisa kweba ili lyashi. Lelo apo tausumiine ifyo nakweba, tawakulalanda mpaka umwana akafyalwe.’

Sekaria tafumine bwangu mwi tempele nge fyo alefuma lyonse. Ilyo afumine, asangile abantu balemulolela, balefwaya ukwishiba icalengele ukuti e fuma bwangu. Lelo Sekaria talelanda. Alebomfya fye iminwe pa kulanda na bantu. Lyena abantu baishileishiba ukuti Sekaria napokelela amashiwi ukufuma kuli Lesa.

Tapakokwele, Elisabete alimiite kabili alikwete umwana umwaume nga filya fine malaika alandile. Abanankwe na balupwa balile mu kumona umwana. Ala balitemenwe. Lyena Elisabete abebele ati: ‘Ishina lya mwana ni Yohane.’ Nabo bamwebele ati: ‘Mu lupwa lwenu tamwaba uwakwata ili ishina. Mwinikeni ishina lya bawishi.’ Lelo Sekaria alembele ati: ‘Ishina lyakwe ni Yohane.’ Ilyo line fye Sekaria alitendeke ukulanda na kabili! Abantu bonse mu Yudea balyumfwile ifyacitike, kabili balepapa abati: ‘Bushe uyu mwana nga akula akaba shani?’

 Lyena Sekaria alipokelele umupashi wa mushilo, kabili alandile ati: ‘Acindikwe Yehova. Alilaile Abrahamu ukuti akatuma kalubula, Mesia uwa kwisatupususha. Yohane akaba kasesema, kabili akapekanishisha Mesia inshila.’

Kwali icaibela icacitikiile Maria lupwa wa kwa Elisabete. Natumone icacitike kuli Maria mu cipandwa cikonkelepo.