Taun ri 400 syadi nasyof kwar rofyor sbawes kaḇer tembok ro kota Yerusalem ani. Imam oso ḇenirḇe Zakharia ma swari Elisabet, suḇarek fanam ro kota ani. Sufarḇuk fyoro kwar mboi suna romawa ḇaime. Ro ras oso, Zakharia ikun dupa ro Rum Ḇesren ya. Fyoro ḇa ido, malaikat Gabriel ryama. Zakharia imkake, ḇape Gabriel ikofen ḇe i, ’Wamkak awer, yun ankinem ḇepyum ḇerama ro Yahwe I. Swambri, Elisabet i, nari daḇen romawa snon oso ma nwir i ḇe Yohanes. Yahwe kyinfir i fa ifrur fararur ḇefandun kaku.’ Zakharia ikofen, ’Yakyar wos ḇenane ḇa, snar nuḇe mansar binsar kwar ḇo rariso na nuna romawa rai?’ Gabriel ikofen wer, ’Allah iwan aya fa yakofenḇair ankinem ine. Snar wakyar wos ayenaḇa, inja nari ḇeawer ma wawos ḇa isof ro romawa ani snari daḇen i.’

Zakharia ryo Rum Ḇesren ya dori kawan kaku. Inja, fafisu syae kwar, snonkaku ḇewaf ro ḇondi sya imbe sifawi rosai ḇeḇejadi ya. Ḇape, jadi fa dawos ḇa. Ḇyesenen monda kuker ḇramin ḇyeja. Mura snonkaku sya insape sifawi Zakharia ismai anun ro Allah I.

Ḇarpur ya ido, Elisabet fyadores ma kyapar romawa snon oso raris malaikat ani ikofen na. Bati ma ḇedar ḇyesya sakrama fa sakmam roma ḇyeja. Simarisen kaku. Elisabet ikofen ḇe si, ’Snori Yohanes.’ Sikofen ḇo soḇo, ’Oso ro kina bedi daknir Yohanes ḇa. Nwiri ḇe Zakharia mura raris kmari.’ Ḇape, Zakharia fyas, ’Snori Yohanes.’ Fafisu anya ḇeri Zakharia dawos kaḇer wer! Farfyar ro romawa anine srower i ro Yudea ḇesiper, ma snonkaku sya skara ḇo soḇe, ’Rosai nari ḇeḇesya kuker romawa ani?’

Ramnai Zakharia ismai rur ḇesren ma ikofen, ’Sanandik faro Yahwe. Ikofen kwar ḇe Abraham nari iwan snonkaku oso fa ḇye manfaspar, isone Mesias  fa fyaspar ko. Yohanes nari ḇye nabi, ma nari fyasos nyan faro Mesias i.’

Elisabet kasun ḇyedi Maria i, daksmai roi oso kako ḇeyun marisen kaku. Rwama kowasya farfyar ḇeuser ya wer.