Plis ki 400 an apre ki miray Zerizalenm ti’n ganny rekonstrir, en pret ki apel Zekarya ek son madanm, Elizabet ti reste o bor sa lavil. Zot ti’n marye pour plizyer lannen me zot ti napa zanfan. En zour, ler Zekarya ti pe bril lansan dan landrwa sen dan tanp, lanz Gabriyel ti aparet avek li. Zekarya ti per, me Gabriyel ti dir: ‘Pa bezwen per. Mon pe anmenn en bon nouvel sorti kot Zeova. Ou madanm Elizabet pou ganny en garson e i pou apel Zan. Zeova in swazir Zan pour fer en travay spesyal.’ Zekarya ti demande: ‘Ki mannyer mon kapab krwar ou? Mwan ek mon madanm nou tro vye pour annan zanfan.’ Gabriyel ti dir: ‘Mon’n ganny anvoye par Bondye pour donn ou sa nouvel. Me vi ki ou pa’n krwar mwan, ou pa pou koze ziska zour sa pti baba i ne.’

Zekarya ti reste en pti pe plis letan ki labitid dan landrwa sen. Alor ler i ti finalman sorti, bann dimoun deor ti anvi konnen ki ti’n arive. Me Zekarya pa ti kapab koze. I ti zis kapab fer bann zes avek son lanmen. Apre bann dimoun ti realize ki Zekarya ti’n ganny en mesaz sorti kot Bondye.

Apre sa, Elizabet ti tonm ansent e i ti ganny en pti garson, zis parey sa lanz ti dir. Son bann fanmir ek zanmi ti vin vwar pti baba. Zot ti vreman kontan pour li. Elizabet ti dir: ‘I pou apel Zan.’ Zot ti dir: ‘Napa personn dan ou fanmir ki apel Zan. Apel li Zekarya parey son papa.’ Me Zekarya ti ekri sa: ‘I pou apel Zan.’ Osito, Zekarya ti konmans koze! Nouvel konsernan sa pti baba ti fannen partou dan Zide e dimoun ti pe mazinen: ‘Ki sa zanfan pou vini?’

Apre, lespri sen ti fer Zekarya dir: ‘Ki Zeova i ganny loue. I ti promet Abraam ki I ti pou anvoy en sover,  Mesi pour delivre nou. Zan pou vin en profet e i pou prepar semen pour Mesi.’

I annan en keksoz spesyal ki ti arive avek Mari osi, fanmir Elizabet. Dan lot sapit nou pou vwar sa.