Sarakalasebaga dɔ, min tɔgɔ ko Zakari, ale n’a muso Elizabɛti tun siginin be Zeruzalɛmu dugu gɛrɛfɛ, saan 400 o dugu laminikogow lɔnin kɔ kokura. U tun furunin lo kabi saan caaman, nka deen tun t’u fɛ. Loon dɔ, ka Zakari to wusulan jɛni na Alabatosoba yɔrɔ senuman kɔnɔ, mɛlɛkɛ Gabiriyɛli bɔra a kan. Zakari siranna, nka Gabiriyɛli y’a fɔ a ye ko: ‘Kana siran. Ne nana ni kibaro diiman ye ka bɔ Jehova yɔrɔ. I muso Elizabɛti bena dencɛ wolo ani a tɔgɔ bena la ko Zan. Jehova ye ale lo sugandi ka baara kɛrɛnkɛrɛnnin dɔ kɛ.’ Zakari y’a ɲininga ko: ‘Ne be se ka la i la cogo di? Ne ni n’ muso kɔrɔla kojugu deen wolo ma.’ Gabiriyɛli ko: ‘Ala lo ye n’ ci ka na o kibaro lase i ma. Nka komi i ma la n’ na, i bena kɛ bobo ye fɔɔ o deen bena wolo.’

Zakari ye wagati min kɛ Alabatosoba yɔrɔ senuman na, a tun ma deli k’o ɲɔgɔn kɛ. Mɔgɔw tun b’a kɔnɔna kɛnɛma. Zakari bɔra tuma min na, u tun b’a fɛ k’a lɔn fɛɛn min y’a sɔrɔ. A ma se ka kuma. A tun b’a bolow lo lamaga dɔrɔn. O tuma na, mɔgɔw y’a faamu ko a ye kibaro dɔ sɔrɔ ka bɔ Ala yɔrɔ.

Wagati dɔ nana se, Elizabɛti ye kɔnɔ ta ka cɛden wolo i ko mɛlɛkɛ tun y’a fɔ cogo min na. A teriw n’a ka mɔgɔw nana deen filɛ. O koo y’u ninsɔndiya. Elizabɛti ko: ‘A tɔgɔ bena la ko Zan.’ U ko: ‘I somɔgɔ si tɔgɔ tɛ Zan. A tɔgɔ la ko Zakari, i n’a fɔ a facɛ.’ Nka Zakari ye kuma nin sɛbɛ ko: ‘A tɔgɔ ko Zan.’ O tuma na, Zakari sera ka kuma tugun! Deen nin ka koo ye Zude dugu bɛɛ ta ani mɔgɔw b’u yɛrɛ ɲiningara ko: ‘Deen nin bena kɔrɔbaya ka kɛ mun ye do?’

Kɔfɛ, Zakari fara hakili senu na. A ye kiraya kuma nin fɔ ko: ‘Tandoli ye Jehova ta ye. A ye layidu ta Ibrayima ye ko a bena kisibaga bila ka na an kisi, o  min ye Masiya ye. Zan bena kɛ kira ye ani a bena sira labɛn Masiya ye.’

Elizabɛti somɔgɔ dɔ tun be yen min tɔgɔ ko Mariyamu. Ala ye koo kabakoman dɔ kɛ ale fana ye. An k’o lajɛ kalansen nata la.