WASE 68
Sucu na Luvei Ilisapeci
Sa sivi e 400 na yabaki na kena tara tale na bai kei Jerusalemi. Rau toka volekata na koro qori na bete o Sakaraia kei na watina o Ilisapeci. Sa dede nodrau vakawati, ia rau sega ni vakaluveni. Dua na siga ni vakama tiko o Sakaraia na ka boivinaka ena valenisoro, e basika mai na agilosi o Keperieli. E rere o Sakaraia, ia e kaya na agilosi: ‘Kua ni rere. Au mai tukuna vei iko na itukutuku vinaka i Jiova. Ena vakasucuma na watimu o Ilisapeci e dua na gonetagane, ena yacana o Joni. E digitaki koya o Jiova ena dua na itavi dokai.’ E taroga o Sakaraia: ‘Au kila vakacava ni o dina? Keirau sega ni rawa ni vakaluveni ni keirau sa qase.’ E kaya o Keperieli: ‘E talai au mai na Kalou meu tukuna qo vei iko. Ia ni o sega ni vakabauti au, o na galu tu me yacova ni sucu na gone.’
A dede ena valenisoro o Sakaraia. Ni curu mai tuba, era via kila o ira na wawa tiko na ka e yaco. A sega ni vosa rawa, mani vosa ga vagalu vei ira. Era qai kila ni tukuna vua na Kalou e dua na itukutuku.
Ni toso na gauna, e bukete o Ilisapeci, mani vakasucuma e dua na gonetagane me vaka ga e kaya na agilosi. Era mai raica na gone nona itokani kei ira na wekana. Dua na ka nodra marau. E kaya o Ilisapeci: ‘Ena yacana o Joni.’ Era kaya: ‘E sega ni dua na wekamu e yacana o Joni. Vakayacani koya ga vei tamana.’ Ia e qai vola o Sakaraia: ‘Na yacana o Joni.’ Ena gauna vata qori e vosa tale o Sakaraia! E kilai levu ena veivanua e Juta na itukutuku me baleta na gone qo, era lomatarotarotaka: ‘Cava mada ena cakava na gone qo ni sa qase?’
E qai sobuti Sakaraia na yalo tabu. E parofisaitaka: ‘Me vakacaucautaki o Jiova. E yalataka vei Eparama
ni na tala mai e dua na ivakabula, na Mesaia, me vakabulai keda. Ena parofita o Joni, ena vakarautaka na sala ni Mesaia.’Dua tale ga na ka veivakurabuitaki e yaco vei Meri, na wekai Ilisapeci. Meda raica mada ena wase e tarava.
“E dredre qo vua na tamata, ia e rawarawa vua na Kalou na ka kece.”—Maciu 19:26