Eejachi wanee wayuu kanüliakai Zacarías, kepiashi nia sümaa nuʼwayuuse pejepünaa sünain Jerusalén. Alatüirü maʼaka 400 juya süchikijee sukumajünüin süchikuaʼa süsepü Jerusalén. Kakaliaina kasaalüin naya otta machonsat Elisabet nümüin süka maralüin shia. Soʼu wanee kaʼi, wanaa sümaa naʼajüin Zacarías wanee wunuʼu jemeta eejuulu suluʼu tü aʼwaajüleekat Maleiwa, eeʼiyataashi nümüin wanee aapiee kanüliakai Gabriel. Ainkuusü maʼin naaʼin Zacarías. «Nnojo mmoluin pia, eesü pütchi anasü nümaʼanajee Maleiwa, kachoinjatü tü puʼwayuusekat otta jiʼitaainjatü Juan nünülia. Aneekünüshi Juan nutuma Jeʼwaa süpüla wanee aʼyatawaa anaka maʼin», nümaka Gabriel nümüin. Nusoutakalaka Zacarías nümüin chi aapieekai: «¿Jamüshi tanoujainjachikai sünain pünüiki? Laülaaina maʼin waya süpüla kachoinjanain». Nusoutaka Gabriel nümüin: «Nia Maleiwa aluwataaka taya sümaa wanee pütchi anasü. Süka nnojoluin punoujain tanüiki, manüijeechi pia, waneʼereʼeya kanülin pia jemeitpa chi joʼuukai».

Kamaʼashi Zacarías suluʼu tü aʼwaajüleekat Maleiwa. Natüjawee aaʼu na wayuukana kasain alatüin nümüin. Akaisaʼa Zacarías nnojoishi asoutuin süka manülin nia. Shiyaawataka saaʼu tü wayuukalüirua sünain nüküjain Maleiwa wanee kasa nümüin.

Ipuwotsü Elisabet mapa, jee kachonkalaka shia maʼaka nüküjain paala chi aapieekai. Antüshii napüshi otta naʼaleewainyuu sünain anaʼlawaa nümüin chi joʼuukai otta talatashaatashii maʼin naya nümaa. «Juan nünülia», sümakalaka Elisabet namüin. «Nnojoishi jaralin müin anülia waʼaka, anashi jiʼitaale Zacarías nünülia maʼaka naaʼin chi nüshikai», namaka sümüin. Nüshajaka Zacarías noʼupala shiainjatüin Juan nünülia. Soʼu kaʼikat tia, kanüishi Zacarías nüchikuaʼa. Aapünüsü nüchiki chi joʼuukai suluʼupünaa tü mmakat Judea. Sütüjawee aaʼu tü wayuukalüirua kasainjatüin naaʼinrüin Juan miyoʼupa nia.

Nüntaka chi naaʼinkai Maleiwa nünainmüin Zacarías, nüküjaka wanee pütchi müsü mayaa: «¡Waʼwaaja Jeʼwaa! Pansaasü nünüiki paala nümüin Abraham sünain nuluwataainjachin chi Mesíaskai süpüla nuʼtteʼerüin waya. Otta müshia Juan, nünüikimaajachi Maleiwa süpüla yapain nutuma nüpüna chi Mesíaskai».

 Eejatü wanee majayüt süpüshi Elisabet, María sünülia. Alatüsü wanee kasa anasü maʼin sümüin. Wekirajaweerü anain tia sünain tü wanee ekirajaayakat.